Turmush — Кемин райондук үй-бүлөлүк дарыгерлер борборуна кир жуучу машина жана мекеменин кызматкерлерине азык-түлүктөр берилди. Бул тууралуу аймактык кабарчы билдирди.
Чүй облусунун Кемин шаардык мэриясына жана шаардык кеңештин депутаттарына райондук үй-бүлөлүк дарыгерлер борборунан кайрылуу келип түшкөн. Анын негизинде борборго кир жуучу машина алынып берилди.
Кемин шаардык кеңешинин төрагасы Кубат Мамыровдун айтымында, учурдагы эпидемиологиялык кырдаалга байланыштуу медицина кызматкерлери 24 саат бою тынымсыз иштеп жатышканы үчүн аларды дайым колдоп туруу керек.
«Өзүңөр билгендей өлкөдө коронавирус илдетине байланыштуу милиция, өзгөчө кырдаалдар кызматтары менен катар эле медицина кызматкерлери дагы тынымсыз иштеп жатышат. Биз элдин саламаттыгы үчүн жан үрөп иштеген медицина кызматкерлерине терең таазим кылабыз. Райондук үй-бүлөлүк дарыгерлер борборунун мобилдик бригадасы кир жуучу машинага өтө зарыл болуп жатышканын билдиришкен. 24-апрель күнү кызматкерлерге жолугуп, ыраазычылыгыбызды билдирип, кир жуучу машина жана азык-түлүк тапшырдык», - деди Кубат Мамыров.