Turmush — Жеке ишкер Нурсултан Шакир уулу коронавирус инфекциясын жуктурган милиция кызматкерлерине да компенсация төлөп берүү керек деп эсептейт.
Учурда дүйнө жүзүндө миллиондогон адамдар үйдө отурууга мажбур. Коронавирус пандемиясына байланыштуу көп өлкөлөр чукул чараларды көрүп жатат. Кыргызстанда да эпидемиологиялык абалга байланыштуу өзгөчө кырдаал режими жарыяланган. Мындай шартта дарыгерлер менен ички иштер органдарынын кызматкерлери оор шартта иштеп жатышат. Ушул тапта 12 милиция кызматкери коронавирус инфекциясын жуктурганы белгилүү болду. Жарандык коомдун өкүлдөрү ички иштер органдарында эмгектенген кызматкерлерге компенсация төлөө керек экенин айтууда. Анткени милиция кызматкерлери да оор кырдаалда жанын тобокелге салып иштеп жатышат.
Жеке ишкер Нурсултан Шакир уулу милиция кызматкерлерине компенсация төлөнүш керек дегендердин катарында. Ал үй-бүлөсүндө милиция кызматкерлери көп болгондуктан, алардын жумушун жакшы түшүнөрүн айтты.
«Менин үй-бүлөмдө милиция кызматкерлери көп. Андыктан мен алардын түйшүгүн жакшы билем. Алар жумушка таңга жуук кетип, караңгыда келишет. Кээ бир учурларда түнү бою иштөөгө туура келет. Айрыкча коронавирус пандемиясына байланыштуу кырдаалда милиция кызматкерлерине оор болууда. Айрымдары калктуу конуштагы посттордо турушат. Ооруканага өз эрки менен барбаган жарандарды милиция кызматкерлери алып барышат. Айтор түнү бою кайгуулда болуп, көчөлөрдү текшеришет. Мыйзам бузган жарандарды кармашат. Андыктан ушул жана башка себептерди эске алып, коронавирус жуктуруп алган милиция кызматкерлерине компенсация төлөө сунушун киргизет элем. Алар деле дарыгерлер сыяктуу чоң эмгек кылып жатышат», - деди Нурсултан Шакир уулу.