Turmush — «Ата журт кыйын күнгө кабылганда, айлансын ар бир уулуң чагылганга»
Бүгүнкү күндө коронавирус инфекциясы менен бүтүндөй дүйнө жүзү күрөшүп жатат. Тилекке каршы COVID-19 пандемиясы Кыргызстанды четтеп өткөн жок. Илдет өлкө жарандарынан аныкталгандан кийин тургундар үйүнөн ээн-эркин чыга албай калды. Мындай учурда күнүмдүк киреше таап тиричилик кылган мекендештерибиз, бөтөн өлкөдө эмгектенген мигранттар, аз камсыз болгон үй-бүлөлөр чоң сыноого туш болду. Өлкө бул илдет менен күрөшүп, оор кырдаалды баштан өткөрүп жатканда эл өкүлү Улан Примов четте карап тура алган жок. Ал зарыл болгон маселелерди кабыргасынан коюп, элдин аярлуу катмарына «Примов» фонду тарабынан жардам берүүнү колго алды.
Алгач Ош облусунун Алай, Өзгөн, Араван, Кара-Суу райондорунда жана Ош шаарындагы миңдеген аз камсыз болгон, материалдык колдоого муктаж, көп балалуу жарандарга ун жана башка азык-түлүктөр жеткирилди. Кол кабыш Ош облусу менен гана чектелген жок. У.Примов Борбор калаадагы жана Чүй облусундагы материалдык колдоого муктаж жарандарды да азык-түлүк менен камсыз кылууга жетишти.
Бүгүнкү күндө депутаттын демилгеси менен кайрымдуулук иштери Жалал-Абад облусунун аймагында да жүрүүдө. Бул үчүн «Примов» фонду тарабынан жүздөгөн азык-түлүк баштыктары камдалган.
Өлкөдө жаралган кырдаалга байланыштуу Улан Примовдун демилгеси менен жана «Примов» фондунун демөөрчүлүгү астында жалпы 85 тонна ун, 5 миңден ашуун азык-түлүк баштыктары, миңдеген бет кап акысыз таратылды. Тактап айтканда, Алай районуна 30 тонна, Өзгөн районуна 30 тонна, Араван районуна 25 тонна ун жеткирилип, калкка берилди. Мындан сырткары Өзгөн районунун калкына 3000 бет кап таратылды. Ал эми Ош облусу жана Ош шаарында жалпы 4700 азык-түлүк баштыктары таратылды.
Чүй облусу жана Бишкек шаарына 1000 азык-түлүк баштыгы таратылып, ошондой эле жеке кайрылган 30 үй-бүлөгө азык-түлүк, материалдык жардамдар көрсөтүлдү. Алдыңкы күндөрү бул сыяктуу жардамдар борбор калаанын жана Чүй облусунун башка аймактарында да уланат.
Мамлекеттеги бүгүнкү кырдаалда четте карап турбай, колдон келген көмөктү көрсөтүү максатында «Примов» фонду бүгүнкү күндөн баштап күн сайын адамдын саламаттыгына кам көрүп, эң оор шартта эмгектенип жаткан ак халатчандарга, тартип сакчыларына 10 күн бою тамак-аш жеткирип берүү демилгеси колго алынды.
«Билимдүү келечек — мамлекеттин эртеңи»
Меценат Улан Примов кайрымдуулук иштерин буга чейин да байма-бай жасап келген. Эл өкүлүнүн демилгеси жана «Примов» фондунун колдоосу менен аймактарды өнүктүрүүгө, калктын социалдык абалын жогорулатууга, дени сак мамлекетти түптөөгө, билимдүү келечекти курууга, өлкөнү санариптештирүүгө, спорт тармагын өнүктүрүп, келечек муунду туура жолго үндөөгө багытталган бир топ иштер аткарылууда. Мисалы, бүгүнкү күнгө чейин алыскы, шарты катаал тоолуу райондордогу окуучуларга көмөктөшүү максатында инвестиция жасалган. Улан Примов ар дайым «эң жакшы инвестиция – келечек муунга жасалган инвестиция» деген ураанды карманып, көп жылдардан бери окуучулардын татыктуу билим алуусуна кам көрүп келет. Бул ирет ал Алай жана Чоң-Алай райондорунун мектептериндеги 11-класста окуп жаткан 100гө жакын окуучуну Ош шаарына алып барып, Жалпы республикалык тестирлөөгө даярдоо курстарында окууга шарт түзүп берген болчу. Окуучулардын бардык чыгымдары «Примов» фонду тарабынан каржыланган.
«Мугалимди сыйлабаган коом өнүкпөйт»
Ошондой эле У.Примов президенттин аймактарды санариптештирүү саясатын колдоп, элет жериндеги мектептердеги сабактардын сапатын арттыруу, заманбап билим берүү ыкмасына өтүү жаатында жалпы фонду 1 миллион сомду түзгөн «Мугалим» долбоорун баштаган. Долбоордун негизги максаты — алыскы Алай жана Чоң-Алай районундагы мугалимдердин кесиптик тажрыйбасын жогорулатуу жана сабак өтүү ыкмаларын заманбапташтыруу болуп саналат. Мугалимдер үчүн семинарлар өткөрүлөт. Иш-чараларга активдүү катышып, мыкты көрсөткүчтөргө жетишкен билим берүү мекемелерине жана мугалимдерге акчалай сыйлыктар, кызыктыруучу белектер ыйгарылат.
Элет элине белек
Алай районундагы шарты катаал айылдардын бири — Сары-Могол айылы. Жыл санап айыл элинин саны көбөйүп жатканына байланыштуу окуучулар айылдагы мектепке батпай, кыйынчылык тартып жатышат. Көйгөйдү уккан эл өкүлү Улан Примов 10 класс бар мектеп куруп берүүнү колго алган. Учурда мектептин долбоору даярдалып, алгачкы жумуштар башталды. Долбоор «Примов» фондунун демөөрчүлүгү астында даярдалууда.
Дени сак улут — күчтүү мамлекет
Алыскы тоолуу айылдарда «Примов» фондунун ден соолук кербени жергиликтүү тургундардын саламаттыгын текшеришти. Алыскы аймактарда жашаган тургундар үчүн ден соолугуна кам көрүү түйшүктүү. Айылдардагы кесипкөй дарыгерлердин жетишсиздиги, жүздөгөн чакырым жолду басып, ден соолугун текшертүү айыл эли үчүн кыйынчылыктарды жаратып келет. Ал эми ден соолук кербени аркылуу жашоочулар жашаган жеринде тийиштүү медициналык жардамдарды алышты.
Ден соолук кербенинин негизги максаты — аталган көйгөйлөрдү чечип, оор шартта күн кечирип жаткан мекендештердин саламаттыгына көңүл буруу болуп эсептелет. Долбоордун алкагында ар тармактуу кесипкөй, тажрыйбалуу дарыгерлер айылдарга барып, күн сайын жүздөгөн жарандардын дарттарын аныктап, тийиштүү кеңештерин беришти.
Спорт — ден соолуктун булагы
Улан Примов спортту колдоо жана анын өнүгүүсүнө салым кошуу жаатында да бир катар иштерди аткарып келет. Ал өлкөнү мыкты спортчулар таанытарын айтып, аймактарга бир нече спорт залдарды курган.
2020-жыл президенттин жарлыгы менен Аймактарды өнүктүрүү, өлкөнү санариптештирүү жана балдарды коргоо жылы деп жарыяланган. Бул багытта «Примов» фондунун демөөрчүлүгү менен бир топ республикалык спорттук иш-чаралар уюштурулуп, спорттук мекемелер курулууда.
Ушул жылды ала турган болсок, Алай районунун Сопу-Коргон айылына бардык шарты менен заманбап спорт комплекстин курулушу башталган. Дал ошондой эле спорт комплекстин курулушу Жаңы-Алай айыл аймагында да башталып, жакынкы мезгилде курулушун аягына чыгаруу үчүн тынымсыз аракеттер көрүлүүдө. Бул спорт залдардын курулушу бүткөндөн кийин объекттер жергиликтүү бийликтин балансына өткөрүлүп берилет.
Жогоруда аталган иштер Улан Примовдун 2020-жылда аткарган айрымдары гана.