Turmush — Ысык-Көл облусун өнүктүрүү фонду жана «Кумтөр Голд Компани» ишканасы Ысык-Көл облусунда коронавирусту алдын алуу жана анын жайылышын көзөмөлдөө иштерине каржылык жардам көрсөтүүдө.
Ысык-Көл облусун өнүктүрүү фондунан облустагы район жана шаарларга жалпы 12 млн сом каралган. Ал эми «Кумтөр Голд Компани» ишканасы 100 000 доллар бөлүп, 60 пайызы Балыкчы шаары, Тоң жана Жети-Өгүз райондоруна, 40 пайызы Ысык-Көл, Түп, Ак-Суу райондору жана Каракол шаарына бөлүндү.
Аталган каражат облустагы саламаттыкты сактоо мекемелерине керектүү жабдыктарды, дары-дармектерди, коргонуучу каражаттарды жана алгачкы медициналык буюмдарды сатып алууга жумшалууда.
Бүгүнкү күндө Ысык-Көл облусунда коронавирусту алдын алуу боюнча облустук ыкчам штаб тарабынан берилген тизмеге ылайык, 5 млн сомго 1300 даана коргоочу костюм, 700 даана резина өтүк, 20 000 медициналык бет кап, 2500 кг хлор, көп ирет колдонуучу 30 000 медициналык бет кап жана 17 270 литр күйүүчү-майлоочу зат сатылып алынды. Андан сырткары кол кап, антисептик, дезинфекциялык аралашма, шприц, респиратор, көз айнек, аралыктан өлчөөчү термометр, гидропульт, пульсоксимерт, суюк самын, жууп-тазалоочу каражаттар жана кол аарчылар алынууда.
Жогоруда аталган медициналык каражаттар Ысык-Көл облусунун район-шаарларындагы саламаттыкты сактоо мекемелерине таратылып жатат. Акча каражаттарын ачык жана максаттуу пайдалануу үчүн Ысык-Көлдү өнүктүрүү фонду, анын байкоочу кенеши көзөмөл жүргүзөт жана келишимдин негизинде сарпталган каражаттар боюнча отчет алынат.