Бөлүмдөр
Ишемби, 18-январь
14.11.2019 09:41 На русском

Адам уурдап, 20 миң доллар талап кылган кылмыштуу топтун мүчөсү кармалды

Turmush -  Жалал-Абад облусунда адам уурдап, издөөдө жүргөн уюшкан кылмыштуу топтун мүчөсү кармалды. Бул тууралуу ОИИБдин басма сөз кызматы билдирди.

Маалыматка караганда, ушул жылдын 11-февралында саат 17:00 чамасында Жалал-Абад шаарынын Б.Осмонов көчөсүндө жайгашкан «Салтанат» ресторанынын жанынан 1991-жылы туулган Т.Ф. аттуу Сузак районунун тургунун белгисиз атуулдар «Хонда Фит» үлгүсүндөгү унаага күч колдонуп салышып, уурдап кетишкен. Кылмышкерлер жабырлануучуну Бишкек шаарына алып барышып, туугандарынан 20 миң доллар талап кылышкан.

Бул факты боюнча топтолгон материал ШИИБдин Кылмыштардын жана жоруктардын бирдиктүү реестрине «Киши уурдоо» болуп катталып, Жазык кодексинин 170-беренесинин негизинде сотко чейинки өндүрүш иши ачылган.

«Аталган кылмыш иштин алкагында ыкчам иликтөө иш-чаралары жүргүзүлүп, буга чейин 2 шектүү колго түшүрүлүп, жабырлануучу туугандарына өткөрүлүп берилген. Бирок кылмыштуу топтун дагы 2 мүчөсүнүн ушул фактыга тиешеси бар экендиги аныкталып, аларга издөө жарыяланган.

2019-жылдын ноябрь айынын башында Жалал-Абад ШИИБдин криминалдык милиция кызматынын опер кызматкерлери тарабынан аталган кылмышка шектүү, ИИМде уюшкан кылмыштуу топтун мүчөсү катары каттоодо турган Чүй облусунун Аламүдүн районунун 1993-жылы туулган тургуну М.Ш. Бишкек шаарында жашынып жүргөн жеринен кармалып, Жалал-Абад ШИИБдин тергөө кызматы тарабынан убактылуу кармоочу жайга киргизилген.

Учурда анын башка да жасаган кылмыш иштерин аныктоо максатында тергөө, ыкчам иликтөө иштери жүргүзүлүп жатат», - деп айтылат маалыматта.

шектуу(1)

Окуя тууралуу

Буга чейин ИИМдин басма сөз кызматы маалымдагандай, 12-февралда милицияга Жалал-Абад шаарынан Сузак районунун 27 жаштагы тургунун белгисиз адамдар уурдап кеткени тууралуу маалымат түшкөн.

Туугандарынын айтымында, кылмышкерлер жигитке күч колдонуп, аны «Хонда Фит» үлгүсүндөгү автоунаага отургузуп алып, белгисиз тарапка качып кетишкен. Аны уурдап качкандар анын туугандарына чалып, 20 миң АКШ долларын талап кылышкан. Аталган факт кылмыштардын жана жоруктардын бирдиктүү реестрине каттоого алынган. Жалал-Абад шаарынын Ички иштер органынын тергөө бөлүмү аталган факт боюнча сотко чейинки өндүрүш ишин баштаган.

Алдын ала алынган маалыматтар боюнча белгисиз адамдар Сузак районунун жашоочусун алдап, эшикке алып чыгып, андан кийин ур-токмокко алышып, унаага отургузуп алып кетишкен. Жабырлануучунун досу жардам берүүгө аракет кылганда, уурулар аны да сабап, телефонун тартып алышкан. ИИМдин маалыматы боюнча «Хонда Фит» автоунаасы уурдалган болуп чыккан.

ИИМдин криминалдык милиция кызматынын 2-башкаруусундагы ыкчам тобу оор кылмышты бетин ачуу ишине кошулган. Кылмыш ишинин издери Бишкек шаарында да изделген. 13-февралда Биринчи май районунун ички иштер башкармалыгына ШИИБдин 102 кызматы тарабынан борбордогу кичи райондун бир батиринен жардамга чакырган кыйкырык угулуп жаткандыгы тууралуу маалымат түшөт. Окуя болгон жерге Биринчи май райондук ИИБдин ыкчам-иликтөө тобу жетип барганда, уурдалган адамды 4 кылмышкер батирде мыйзамсыз кармап тургандыгы аныкталган. Кылмышкерлер аны байлап коюп чыгып кетишкен. Жабырлануучу колун бошотуп жардамга чакырган.

ИИМдин криминалдык милиция кызматынын 2-башкаруусундагы ыкчам тобу менен Жалал-Абад ОИИБдин криминалдык милиция кызматы тарабынан ыкчам изилдөө иш-чарасынын жыйынтыгында кылмышка шектүүлөрдүн бирөөсү колго түшүрүлгөн. Кармалган адам Ош облусунун Өзгөн районунда 1998-жылы туулган тургуну болуп чыкты.

Алдын ала алынган маалыматтар боюнча кармалган жаран мурун да соттолуп, Россия аймагынан кылмыш жоопкерчилигине тартылган. Азыркы учурда адам уурдоо жана опузалап талап кылуу фактысына шектелген 3 адамды кармоо жана алардын жүргөн ордун аныктоо боюнча иштер уланууда.



Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×