Бөлүмдөр
Шаршемби, 13-ноябрь
Ысык-Көл облусуТүп району 09.11.2019 14:51 Жаңыланды: 09.11.2019 17:02 На русском

«Маркум аялымдын жанынан орун алып койгом»: Түптөгү жалгыз корейдин жашоосу

Turmush -  Виктор Илларионович Ким Түп районунда жашаган корей улутундагы жалгыз адам. Бул тууралуу 7-ноябрда Тарых жана ата-бабаларды эскерүү күнүндө маалым болгонун аймактык кабарчы билдирди.

Эскерүү күнүндө Үркүндө шейит кеткендерге куран окутууга, Лениндин эстелигинин жанында Октябрь революциясын эскерүүгө да катышкан 77 жаштагы Виктор Ким менен аймактык кабарчы баарлашты.

Ал өз сөзүндө: «Мен Кыргызстанга келип жашап жаткандан кийин "Кайсыл жердин суусун ичсең, ошол жердин ырын ырда" дегендей, түптүк корей-кыргызмын. Түп районуна келгениме жакында 60 жыл болот. Ушул жерден дос күттүм, бир жерден кетпей иштеп аброй таптым. Өлсөм сөөгүм ушул жактан чыксын деп, маркум аялымдын жанынан орун алып койгом», - деди.

В.И.Ким Ысык-Көл облусуна жолдомо менен келип калган.

«Мен 1942-жылы Өзбекстандын Ташкент облусунун Свердлов колхозу айылында туулгам. Новосибирскте Айыл чарба институтун аяктап, зоотехник адистиги боюнча билим алгандан кийин партиялык жолдомо менен Ысык-Көл облусунун Түп райондук айыл чарба башкармалыгына адис болуп келдим.

1969-жылы айыл чарба башкармалыгынын башчысынын орун басары болуп, пенсияга чыкканга чейин бир орунда иштедим. 1969-жылы Түп райком партиясынын биринчи катчысы С.Абдракманов "УАЗ-469" унаасын бекитип берген. Ушул унааны айдап жүргөнүмө быйыл 50 жыл болду», - деди В.Ким.

Ошондой эле ал өзүнүн үй-бүлөсү тууралуу айтып берди.

«1969-жылы Түпкө келе жатканда 1943-жылы туулган жердешим, менден бир классты кийин бүтүргөн корей кызы Раиса Кимди ала келгем. Ал убакта жаңы келген адистерге даяр үйлөрдү беришчү. Мен айыл чарба бөлүмүндө, Раиса болсо музыкалык мектепте иштеп калдык. Мен райондук айыл чарба башкармалыгынын орун басарынан көтөрүлө алган жокмун, аялым болсо музыкалык мектептин окуу бөлүмүнүн башчылыгына чейин жетти.

1970-жылы тун кызыбыз Наталья Ким төрөлдү. 2 жогорку окуу жайын аяктаган. Бишкекте орус тилчи мугалим болуп иштейт. 1975-жылы Алексей Ким төрөлдү. Азыр Тольятти шаарында прораб болуп иштейт. 1981-жылы Виктор Ким төрөлдү. Ал Бишкек шаарында Мамлекеттик каттоо кызматында иштейт. 5 неберем бар.

Раиса 2004-жылы каза болгондо көрүстөнгө сөөк коюп жатып балдарыма: "менин сөөгүмдү энеңердин жанына койгула" деп айткам. Азыр жалгыз жашайм. Уул-кыздарым, неберелерим жайында келишет. Жыл сайын өзүм чарбакта өстүргөн жер-жемиштерден салаттардын түрлөрүн даярдап, мөмө-жемиштерден компоттордун түрлөрүн жасап, неберелериме берип жиберем. Негизи убактымды китеп окуу менен өткөрөм. Кошуналардын жакшылык жана жамандыгына катышып турам», - деди Виктор Ким.

«Аялыңыз каза болгондон кийин кайра нике жаңырткан жоксузбу?» деген суроого: «Мен Раисаны Өзбекстандан алып келе жатканда: "тирүү жүрсөк бир үйдө, өлсөк бир көрдө бололу" деп убадалашканбыз. Кайра экинчи үйлөнүүгө толук шарттар бар эле. Артымдан чуркаган келин-кыздар көп болчу. Бирок "балдарга кандай эне туш келет?" деп ойлондум. Анын үстүнө мен музыкалык аспаптарда ойноп, Раиса созолонто корейче, орусча, кыргызча ырдаган бактылуу күндөрүбүздү унута албайм», - деп жооп берди.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×