Бөлүмдөр
Шаршемби, 13-ноябрь
Ысык-Көл облусу, Балыкчы 06.11.2019 12:17 Жаңыланды: 06.11.2019 18:28 На русском

Видео — Балыкчыдагы бала бакчада чыр чыкты. Окуянын чоо-жайы

Turmush -  Балыкчы шаарындагы №10 бала бакчанын кызматкерлеринин арасында чыр чыгып, ал улук ашпозчунун жумуштан алынышы менен аяктады. Окуянын чоо-жайын аймактык кабарчы териштирген.

Улук ашпозчу Алтынай Абдраева жумуштан мыйзамсыз алынганын айтууда.

«Мен №10 "Жоогазын" бала бакчасында 4 жылдан бери башкы ашпозчу болуп иштеп келгем. Эми мени жумуштан мыйзамсыз кетиришти. Бала бакча 2015-жылы ачылган. Ага чейин башка бала бакчада иштечүмүн. Бул бала бакча ачылганда анын директору Майрам Кулова мени ишке чакырган. Үйүмө бул бала бакча жакын болгондуктан макул болуп, 2015-жылдан бери эмгектенип келгем. Мен тажрыйбалуу ашпозчу катары жаңы кызматкерлерге ишти үйрөттүм. 2016-жылы Гүлсара деген жардамчым бар болчу, ал декретке кеткенден кийин бизде иштеген медайымды мага жардамчы кылып коюшту. Мага жумуш өтө оор болуп калды. Медайымдын өзүнүн жумушу болуп, мага жардам бергенге убактысы аз болду. Мен бир айдан кийин директорго кирип, жалгыз иштеген оор болуп жатканын айткам. Ал "ал бойдок келин, акча таап алсын. Мага дагы ушинтип кирсең жумуштан чыгарам. Иштесең жөн иште" деп жооп берди.

Ушул окуядан кийин кампадагы 40 кг эт чирип кеткен. Чарба башчысы Айжан болчу. Эт чирип кеткенин мен билген эмесмин. Ал тамак-аш алганда муздаткычты өчүрүп кетиптир деп мени күнөөлөп коюптур. Анда дагы директор мени чакырып алып, жумуштан кет дегенге чейин барды. Мен күнөөлүү эмес экенимди айттым. Ал мага мындай иш экинчи кайталанбасын деген эскертүү берди. Ошону менен ишти бүтүрдүк», - дейт улук ашпозчу.

Кийин бала бакчада кайрадан чыр чыкканын айтты.

«Гүлсара аттуу жардамчым декреттик өргүүдөн кийин жумушка келди. Экөөбүз жакшы иштеп жаттык. 2019-жылдын 26-февралында ал ден соолугуна байланыштуу жумуштан чыгып кетти. Ушул жылдын 1-мартында Гүлзат деген кызды мага жардамчы кылып жумушка алышты. Ал директордун эжесинин кызы экен. Аны менен дагы иштешүү мага оор болду. Ал той-аштарда буйрутма менен тамак жасап иштейт экен. Ал тойго барам деп көп учурда жумуштан эрте кетет. 5-күн сайын жумушка келбейт.

Гүлзат 6-июнга чейин иштеди. Ошол убакта директор мени чакырып: "Гүлзат жайкы сезондо акча таап алсын, 3 ай жок болот" деди. Мен аргасыз макул болдум. Документ боюнча анын жумушу жүрүп жатты. Гүлзаттын биринчи айлыгынан 3 миң сомун мен алдым. Анын айлык маянасы 5 миң сом болчу.

Кийин жайкы оңдоо иштерин өзүм жалгыз бир айда бүтүрдүм (актоо иштеринен башкасын). 1-августта өзүм бир айга эмгек өргүүгө чыктым. Ошондо дагы мени 10 күн чакыртып, комиссия келе турганын айтып иштетишти.

1-сентябрдан тарта 150 бала бала бакчага келди. Мен Самаган аттуу чарбанын башчысынан 3 кг 800 грамм эт алып, тамак бышырдым. Эртеси 250 бала келе турганын айтып, көбүрөөк эт берүүнү өтүндүм. Ал 4 килограммга жетпеген эт берди. Аны 250 балага эптеп жеткирдим.

4-сентябрь күнү ашкана эмнеге чачык деп Гүлзат жардамчыма айткандан кийин уруш чыгып кетти. Директор келди. Ал мени урушуп, "кечээки тамагыңдын даамы жок" деп кошумчалай кетти. Мен аны түшүндүрүп, эт аз берилгенин, 150 балага жете турган этти 250 балага жеткиргенимди чарбанын башчысынын көзүнчө айттым. Жыйынтыгында мени күнөөлөп койду. Ошондо мен шаардык билим берүү бөлүмүнө кайрылып, болгонун болгондой айттым. Андан 2-3 күндөн кийин эле директор жардамчым Гүлзатты жумуштан кетирди. Мен 10-сентябрдан баштап жалгыз иштеп калдым. 29-сентябрда Элмира деген жардамчы келди. Ноябрдын башында директор чогулуш жасап, мэриядан, шаардык билим берүү бөлүмүнөн киши чакыртып, "мени адамдар менен иштеше албайт, урушчаак" деп жумуштан алуу сунушун киргизди. Мага жалган жалаа жабышты. Ошентип, мени кызматкерлердин добушу менен жумуштан кетиришти. Учурда мен прокуратурага арыз жаздым. Ошондой эле Билим берүү жана илим министрлигине жана тиешелүү органдарга кайрылып жатам. Бир гана акыйкатты талап кылам», - деди ал.

№10 бала бакчанын директору Майрам Кулова да окуя боюнча өзүнүн пикирин билдирди.

«160 орундуу бала бакча 2015-жылы ачылган. Ошондон баштап директор болуп иштеп келе жатам. Учурда 312 бала бакчага келет. Улук ашпозчу Алтынай Абдраева 2015-жылдан бери ашпозчу болуп иштеп келген. Мурда ал "Максат" бала бакчасында эмгектенген. Мага кайрылганынан анын тажрыйбалуу ашпозчу экенин эске алып, жумушка кабыл алгам. Жакшы эле иштешип баштаганбыз. Бирок ал өзүнүн оюн бербей, кызматкерлер менен көп урушту. Ашканада меню түзгөнгө ашпозчу, медайым катышып, азык-түлүктү чарбанын башчысы берет. Ушул үчөөнүн ортосунда келишпестик болду. Мындай көрүнүш 2016-жылдан бери эле болуп келе жатат. Негизи ал ашкананын тазалыгын карап, эскертүүлөрдү берип турат.

Чыр боюнча акт түзүлгөн, көп жолу эскертүү бергем. Атүгүл сөгүш да жарыяладым. Анан Алтынай: "Мени эле урушасың, башкаларга унчукпайсың, аларды жумуштан кетирбейсиң" деп нааразы болуп жүрдү. Мисалы, чарбанын башчысы жакшы иштеп жатса, эмнеге иштен кетирем? Мен Алтынайга: "Сен улуусуң, өзүң үлгү болуп, бири-бириңерди түшүнүп иштешкиле" дегем. Бирок мындай көрүнүш улана берди.

2019-жылы апрель айында кампада бир мүшөк ун артып калыптыр. Эсептөө палатасынан текшерүү келип, ашып калган унду аныктап чыгышты. Март айында жаңы келген чарба башчы "бул ундан таттууларды жасайлы десек, Алтынай жасабай койду" деди. Бир мүшөк ун үчүн мен айып төлөдүм. Эмне үчүн жасабай койгонун Алтынайдан сурасам, ал жардамчысы Гүлзат жасай албаганын айтты. Ал шаардагы мыкты ашпозчулардын бири болсо, кантип жасаганды билбесин? Ал айткандай Гүлзат менин эжемдин кызы эмес. Менимче, ал жөн гана аны жаман көрсөткүсү келген.

3-сентябрь күнү кайрадан экөөнүн урушу башталды. Эртеси, 4-сентябрь күнү билим берүү бөлүмүнө жумуштап барып, кайра келгенде эки ашпозчунун ортосунда дагы уруш болгонун айтышты. Ошондо акт түзүп, Алтынайга сөгүш жарыяладым. Экөөнүн ортосунда уруш токтобой, Гүлзат иштен кетип калды. Ал эми Алтынай менин үстүмдөн арызданып, билим берүү бөлүмүнө, прокуратурага кайрылыптыр.

Бала бакчанын кызматкерлерине шарт түзүп берүү менин максатым. Улук ашпозчу менен урушкан кызматкерлер жумуштан кетебиз деп башташты», - дейт бала бакчанын директору.

Ошондой эле ал улук ашпозчуну жумуштан кетирүүгө бала бакчанын кызматкерлери добуш беришкенин айтты.

«Бир жолу ашканада айран жетпей калганын айтышты. Мен "айранды ченеп бербедим беле, жетиши керек болчу" деп кийим илген шкафты ачууну өтүндүм. Алтынай ачкыч жок экенин айтты. Анан кулпусун сындырып ачтырдым. Ичинен кумшекер, геркулес, буурчак, кесме сыяктуу азык-түлүктөр чыкты. Ал мойнуна албай, мунун баары Гүлзаттыкы экенин айтты. Мен Гүлзат бир ай мурун иштен кеткенин айтсам дагы мойнуна алган жок. Ошентип ага акт түзүлдү. Мен РИИБге арыз жаздым. Кыскасы ушул сыяктуу көрүнүштөрдү эске алып, билим берүү бөлүмүнө кайрылып, жамаат менен чогулуш жасадык. Чогулушка тиешелүү адистер чакырылган. Ошондо жогорудагы кылыктары айтылып, добуш берүү менен жумуштан кетсин деген чечим чыкты», - деди директор.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×