Бөлүмдөр
Жекшемби, 17-ноябрь
Ош облусу, Ош 01.11.2019 09:23

Кыргыз милициясына 95 жыл: Ош ШИИБдин кызматкерлери спорттук мелдештерде күч сынашты

Turmush -  Ош шаардык ички иштер башкармалыгы тарабынан уюштурулган спорттук мелдештер жыйынтыкталды. Бул тууралуу Ош ШИИБдин басма сөз кызматы билдирди.

Кыргыз милициясынын түзүлгөндүгүнүн 95 жылдыгына карата Ош ШИИБдин бөлүмдөрү жана кызматтары арасында кичи футбол, волейбол жана аркан тартыш боюнча мелдештер өткөрүлгөн. Кечээ, 31-октябрь күнү борбордук стадиондо мелдештин жеңүүчүлөрү сыйланышты. Салтанаттуу иш-чарага Ош ШИИБдин башчысы Мурат Боронов катышып, өздүк курамды куттуктады.

«Спортту жакшы көрбөгөн милиционерден мыкты кызматкер чыкпайт. Анткени спорт менен машыкпай туруп кылмышкерди кармоо кыйын. Ар бир милиция кызматкери үзгүлтүксүз спорт менен машыгып турууга тийиш», - деди М.Боронов.

Жеңүүчүлөргө кубок, диплом жана акчалай сыйлыктар ыйгарылды. Иш-чарага Ош ШИИБдин башчысынын орун басарлары: милициянын полковниктери Т.Нурбаев, А.Раимбердиев, А.Бахрамов жана башкармалыктын ардагерлер кеңешинин төрагасы К.Кадыров дагы катышты.

Кичи футбол боюнча мелдеште 1-орунга ОШ ШИИБдин тез аракеттенүүчү атайын отряды, 2-орунга Криминалдык милиция кызматы, 3-орунга Сулайман-Тоо милиция бөлүмчөсүнүн командалары ээ болушкан.

Ал эми волейбол боюнча мелдеште 1-орунду Сулайман-Тоо милиция бөлүмчөсү, 2-орунду Борбордук аппараттын кызматкерлери, 3-орунду кайгуул батальонунун командасы алган.

Аркан тартыш боюнча мелдеште мырзалар арасында 1-орунга Борбордук аппараттын кызматкерлери, 2-орунга Криминалдык милиция кызматынын кызматкерлери, 3-орунга Сулайман-Тоо милиция бөлүмчөсүнүн командасы ээ болду. Айымдар арасында өткөрүлгөн аркан тартышта 1-орунду Борбордук аппараттын, 2-орунду кайгуул батальонунун, 3-орунду Сулайман-Тоо милиция бөлүмчөсүнүн кызматкерлери утушту.

Андан сырткары «мыкты дарбазачы», «мыкты чабуулчу», «мыкты коргоочу» , «мыкты оюнчу» наамдарынын ээлери сыйланды.

Мелдештердин жалпы байге фонду 60 миң сомду түзүп, аны өздүк курамдын кызматкерлери топтошкон.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×