Бөлүмдөр
Бейшемби, 14-ноябрь
Нарын облусу, Нарын 23.10.2019 15:56 На русском

Ат-башылык жубайлардын сүйүүсүнөн айрымдар «шек» санашат

Turmush -  «Жубайлар» рубрикасынын бул жолку каармандары — Ат-Башы районуна караштуу Ат-Башы айылынын тургундары Нурлан Барктабасов менен Перизат Жусупова.

Нурлан Барктабасов менен Перизат Жусупованын 5 баласы, 4 небереси бар.

Нурлан Барктабасов 1972-жылы Ат-Башы районунун Ат-Башы айылында туулган. 4 бир туугандын кичүүсү. 2010-жылдан бери Ат-Башы райондук маданият бөлүмүндө кароолчу болуп эмгектенет.

«Мектепти аяктап, шаарга окууга бардым. Бирок өтпөй калдым. 1991-жылы 2-топтогу майыптыкка чыккам (гипотиреоз). Ошондуктан аскерге кетирбей коюшкан. Андан кийин үйлөнүп-жайландым.

Перизат экөөбүз 2006-жылы ноябрь айында таанышып, бири-бирибизди жактырып үйлөнүп калдык. Мен Бишкек шаарында болчумун. Барып-келип иштечүмүн. Перизатты кокустан эле көрүп калып жактырдым. “Турмушка чыгасыңбы?” дедим, дароо эле макул болду. Кудайга шүгүр, элден ашып кетпей, элден калып калбай жашап жатабыз.

Үй-бүлө бекем болушу үчүн ортодо ынтымак болушу керек. Уруш-талаштан деле эч нерсе чыкпайт. Бири-бирибизди деле кызганбайбыз, дайыма чогуу жүрөбүз. Кээ бири "кызганып, анан чогуу жүрөт" деп ойлошу мүмкүн. Бири-бирибизди жакшы көргөндүктөн дайыма бирге жүрөбүз. Перизатты жумушка унаа менен жеткирип коем, кайра тосуп алам. Бардыгын кеңешебиз. Жада калса тамеки алсам дагы, Пеку менен кеңешип алам (күлүп). Айлыгыбыз кудайга шүгүр, жетет. Жаман деп айтканга болбойт, шүгүр деш керек», - деди ал.

Перизат Жусупова 1974-жылы Ат-Башы районунун Бирлик айылында туулган. 10 бир тууганы бар. Ал учурда Ат-Башы районундагы Жумамүдүн Шералиев атындагы музыкалык мектебинде кенже кызматкер болуп эмгектенет.

«Атамдын көзү өтүп кетти, апам кол өнөрчүлүк менен алек. Ынтымактуу, жакшы үй-бүлөдөнбүз. Сен-мен деп талашпайбыз. Бир столдо отуруп кеңешип, оокат кылабыз. Алган айлыгыбызды деле сеники-меники дешпей ортого коюп, алчуну алып, берчүнү беребиз. Кызым дагы айлык алат, ал деле атасына алып келип берет. Бири-бирибизди дайыма колдойбуз. Нурлан мени көп жерден колдон-буттан алып кетет. Менин дагы Нурланга болгон урмат-сыйым абдан жогору, дайыма колдоп турам. Жумуштан келгенде кабагын карап турам.

Чындыгында небере таттуу, ысык болот экен. Эң кичүү неберебизге жалынып-жалбарып, күйүп-бышып жакшы көрөбүз. Буту басып, өнөрү чыккан сайын сүйкүмдүү көрүнөт. Өзүңдүн балаңды дагы ушундай жакшы көрбөйсүң. Небере жакшы экен. Биринчи айткан сөзү «таята» болду. Эртең менен турганда эле таятасына чуркайт.

Алдыда жакшы пландарыбыз бар. Кудай буюрса жакында неберебиздин тушоосун кесебиз. Келечекте чоң там алууга аракет кылып жатабыз. Мал-жан кармасак дейбиз. Айтор, буттан туруунун аракетин көрүп жатабыз», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×