Бөлүмдөр
Шаршемби, 13-ноябрь
Чүй облусуАламүдүн району 14.10.2019 10:39 На русском

16 000 долларга сатылган «Гулливер»: И.Абдралиев кочкорун 20 000 долларга эмне үчүн сатпай койду?

Turmush -  Чүй облусунун Аламүдүн районундагы Арашан айылынын тургуну Искендер Абдралиев «Гулливер» аттуу кочкорун 16 миӊ долларга сатты. Аны менен аймактык кабарчы таанышты.

Өзүнүн айтымында, андан кийин дагы бир чоӊ кочкорун 20 миӊ долларга сураган кардарларга сатпай койгон.

«Ушул жылдын июль айында Казакстандын Шымкент шаарында эл аралык көргөзмө өтүп, ага «Гулливер» аттуу кочкорубузду алып барганбыз. Ал жеке ишкерлерге 16 миӊ долларга сатылып кетти. Анын салмагы 188 кг, бою 1 метр болчу. Бул «Гулливер» айтылуу «Кораблдин» тукуму. Анын салмагы 217 кг болчу.

Жакында эле, тактап айтканда 8-сентябрь күнү өткөн көргөзмөдө 2,5 жаштагы, 180 кг салмактагы кочкорубуз 20 миң долларга бааланды. Бирок биз саткан жокпуз. Себеби, козуларын (бир төлдү) 300 доллардан сатканда эле ошол кочкордун баасы чыгып калат. Жакшы кочкорду колумдан чыгаргым келген жок», - деди ал.

Жеке ишкер койдун жаӊы тукумун өстүргөнүнө 12-13 жылдай болуп калганын айтат.

«Арашан айылында мал чарбам бар. Мен баккан койлор гиссар эмес. Кыргыз куйруктуу койлор десем болот. Учурда жаӊыдан каттоодон өткөрүп жатабыз. Эт багытындагы койлор. Кочкорлор 120-150 киллограмм салмакка чейин жетет. Чарбамдагы кочкорлордун эӊ чоңу 188 кг (тирүү салмагы) болгон. Ал эми койлор 80-120 кг салмакка чейин жетет. Койлордун арасындагы бир кой 137 кг салмакка чейин жеткен.

3 айлык козулары 200 доллардан жогору. Эң кымбаты 1 миӊ долларга бааланат. Ал эми чоӊ кочкорлор 1 миң доллардан 20 миң долларга чейин бааланат. Ургаачы койлор 20 миң сомдон 100 миң сомго чейин сатылат», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×