Бөлүмдөр
Дүйшөмбү, 14-октябрь
Ысык-Көл облусуЫсык-Көл району 10.10.2019 16:39 Жаңыланды: 12.10.2019 18:39

Кылым карыткан карылар: 105 жаштагы Күлүшай апа кыбырасынын баласын багышат

Turmush -  Ысык-Көл районунун Кашат айылынын 105 жаштагы тургуну Күлүшай Боруева небере, чөбөрө, кыбырылары менен бирге жашап, учурда кыбырасынын 3 айлык ымыркайын бакканга жардам берүүдө. Аймактык кабарчы кылым карыткан эне менен таанышты.

Өзүнүн айтымында, анын 5 кызы, 1 уулу бар.

«Өмүрлүк жарым экөөбүз 5 кыз, бир уулду тарбияладык. Учурда 80ден ашык небере, чөбөрө, кыбыраларым бар. Бул турмушта согуштан башка жамандык көргөн жокмун. Жараткан мага узак жаш бериптир, акыл-эсим жайында болсо экен деп тилейм. Дайыма балдарым менен турмуштук тажрыйбам менен бөлүшөм. Келинимди баламдан артык көрөм. Азыр небере, чөбөрө, кыбыраларым дагы үйлөнүп, балалуу болушту. Кыбырамдын 3 айлык баласын жаныма жаткырып коюшуп, өздөрү түшүм терип, иштерин бүтүрүп, сыртта жүрө беришет», - дейт Күлүшай апа.

Ал 20 жашында өзү туулуп өскөн Кашат айылына эле келин болгон. Жолдошу экөө 6 баланы тарбиялап өстүрүшкөн. Өмүр бою колхоздун жумуштарын аткарып, көбүнчө сугат иштери менен алек болгонун айтат.

«Эгер ошол учурда сугаттан башка жумушта иштесем, азыр балким ден соолугум жакшы болмок, учурда бутуман гана жабыркайм», - дейт Кулушай апа.

Келиндеринин айтымында, Күлүшай апа бир кылымдан ашык жашаса да акыл-эси тунук, баскан-турганы тың. Дайыма небере-чөбөрөлөрүнө жомок айтып берет. Күн сайын радио угуп, өлкөдө болуп жаткан жаңылыктар менен да кабардар. Чай үстүндө уккан жаңылыктарын үй-бүлөсүнө да айтып берет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×