Бөлүмдөр
Дүйшөмбү, 14-октябрь
Ош облусу, Ош 10.10.2019 16:13 На русском

Мыгы бар таяк менен сабаган аяш апасынан жана 18 жаштагы кыздан өч алуу: Бир түндө бети ачылган кылмыш

Иллюстрациялык сүрөт
Иллюстрациялык сүрөт

Turmush -  Быйыл кыргыз милициясынын түзүлгөнүнүн 95 жылдыгы белгиленүүдө. Ага утурлай Turmush басылмасы Ош облустук ички иштери башкармалыгы менен биргеликте ардактуу эс алууга чыккан офицерлер жана учурда ички иштер органдарында иштеген кызматкерлер тууралуу бир катар материалдарды даярдады.

1959-жылы туулган Мирсеит Мирзалиев милициянын отставкадагы полковниги. Ал 1983-2009-жылдары ички иштер органдарында кызмат өтөгөн.

Мирсеит Мирзалиев

Ардактуу эс алуудагы офицер иш тажрыйбасындагы эстен кеткис окуя тууралуу айтып берди.

Эскертүү: Окуядагы адамдардын аты-жөнү өзгөртүлдү.

«Кыш аяктап, кар ээрип, жер кара тартып калган. Күндүз муз ээрип, көчөлөр ылай-баткак. Мен Баткен районунан Ноокат районуна жумуштан которулуп келген мезгил болчу. Түнкү саат 03:00 чамасында Ноокат райондук ички иштер бөлүмүнүн нөөмөт бөлүмчөсүнө белгисиз адам тарабынан айылдын чоң көчөсүндө турак үй өрттөнүп жаткандыгы тууралуу маалымат түшкөн. Нөөмөтчү Сүйүн дароо жардамчысы, милициянын старшинасы Азим менен бирге аталган факт тууралуу өрт өчүрүү кызматына кабарлап, милициянын ыкчам тобун окуя болгон жерге жөнөтүштү. Ыкчам топ: анын жооптуу жетекчиси мен, тергөөчү, ыкчам кызматкер Муктар, МАИ (учурдагы ЖКККБ) кызматкери Сапардын кызматтык унаасы менен (эскилиги жеткен унаа, ал да түртүп жүргүзүлөт) окуя болгон жерге жетерибизде нөөмөтчүнүн жардамчысы Азим ооруканага денеси күйгөн кыз түшкөндүгү боюнча кабар келгенин айтты. Ооруканага барып, дарыгерлерден ошол денеси күйгөн кыз кайдан алынып келингенин, абалын сурап, кызга жолуктук. Кыз аябай коркуп калган. Бети-башы күйүптүр. Кызга медициналык жардам көрсөтүштү. Бети-башын тазалап, дары-дармек берип жаткан учурда кызга суроолорду берип, анын жоопторунан кыз өрттөнгөн үйдө жашарын, апасы Бактыкан менен 18 жаштагы эжеси Гүлмайрам экөө үйдө калгандыгын билдирди. Кыз түндө алардын үйүнө Урмат аттуу айылдашы келгенин да араң түшүндүрдү.

Өрттөнгөн үйгө бат эле жеттик. Өрт өчүргүчтөр өз жумуштарын жүргүзүп, күйгөн от өчкөнү калыптыр. Түтүн, ыш, жагымсыз жыт... Өрт өчүрүлдү, бирок коюу түтүн тарай элек. Өрт өчүргүчтөр менен бирге үйгө кирип, колчырактын жарыгынын жардамы менен түтөп жаткан төшөктөн эки адамдын чала күйгөн денелери көрүндү. Тергөөчү катары кырсык болгон жерге кароо жүргүзүп, протокол түзүп, денелерге сырттан кароо жүргүзгөндө бирөөсүнүн баш сөөгүнүн жарылганы байкалды. Денелерди өлүкканага жөнөтүүнү тапшырып, мен, ыкчам кызматкер Муктар жана МАИ кызматкери Сапар үчөөбүз шектүү Урматтын атасынын үйүнө жөнөдүк. Мен Урматтын атасы Өмүрбекти таанычумун. Таң ата элек, адамдар таттуу уйкуда болчу. Өмүрбектин үйүнүн эшиги ачык экен. Муктарга аялдардын көлөчүн, эркектердин эски бут кийимдерин, ылайы кургай элек суу кышкы чолок өтүктү көрсөттүм. Аңгыча үйдүн ээси Өмүрбек чыкты. Суу болгон бут кийим кимдики экенин сурадык. Ал “менин үч чоң балам бар, бирок өтүк бирөө эле, кимиси кийип келгенин билбейм, сурайынчы” деп үйгө кирди. Муктар, Сапар, мен анын артынан кошо кирип, полго салынган төшөктө жаткан 3 баланы көрдүк. Өмүрбек милиция келди, өтүктү кимиңер ылай кылып кийип келдинер?” деп сураганда чет жакта жаткан бала козголуп тура баштады. Муктар менен Сапар аны колунан тартып, тургузууга жардам беришти. Анан унаага алып барып салышты. Мен Өмүрбекке башын айтып, саат ондорго милицияга келүүсүн эскерттим.

Өрт чыккан үйгө келсек, РИИБдин кылмышкерлерди издөө бөлүмчөсүнүн башчысы Бакыт, аны менен дагы 2-3 милиция кызматкери келишиптир. Аларга Урматтын кармалганын айтып, чогуу РИИБге келдик. Урматты ооруканага жеткирилген кызга көрсөткөндө, жабырлануучу кыз түн ичинде алардын үйүнө ошол киши келгендигин тастыктады», - деп эскерди Мирсеит Мирзалиев.

Кармалган Урматтын көрсөтмөсү

«Урмат кылмышты жасаганынын себебин түшүндүрүп берди. Ал 4-класста окуп жүргөндө классташы Гүлмайрам (каза болгон кыз) менен уруша кетип, аны ыйлатып коюптур. Кыздын апасы Бактыкан колуна мыгы бар таяк көтөрүп келип, Ураматты башы-көзүнө чапкылап, катуу сабаптыр. Ошондон кийин Урматтын кулактары ооруп, соңку кезде оорусу күчөп, чыдатпай ооругандыгын, кийин бир кулагы укпай калганын айтты. Анан Гүлмайрам апасы менен Урматты “керең кулак, кулагынан ириң аккан акмак" деп кемсинтип, мазакташканынан, алардан өч алууну чечиптир. Кыштын суугунда райондун борборунан арак ичип, үйүнө кайтып келе жатканда Бактыканга жолугуп калат. Бактыкан адатынча Урматты мазактайт. Урмат кулагы чыдатпай ооруганына карабастан үйүнө барып, агасынын өтүгүн кийип, үйдөн ашкана бычагын алып, түнкү саат экилерде Бактыкандын үйүнө барыптыр. Анан Гүлмайрамды чакырып, ал үйүнөн чыгып, түн ортосунда эмнеге келгенин сурап, мазактаптыр. Урмат кыздын кемсинткен сөздөрүнө арданып, кызуу абалда үйүнө кирип барып Гүлмайрамга бычак саят. Анын кыйкырганынан чочуп ойгонгон Бактыканды да бычактап, кичүү кызын (ооруканага түшкөн кыз) башына урат. Кыз эс-учун жоготуп коёт. Урмат Гүлмайрамдын, Бактыкандын көкүрөктөрүнө, ичтерине, далыларына кайра-кайра бычак сайып, башка-көзгө ургулап, баары өлдү деп изин жашыруу максатында үйдү өрттөйт. Милициянын иттери таап албасын деп үйүнөн тетири багытка барып, арыктагы сууну бойлой ээн талаа менен кайра үйүнө барган. Өмүрбектин үйүнөн көргөн өтүк ошол арыктагы сууну кечкенде суу болуптур. Урматтын көрсөтмөсү боюнча, ал арыкты бойлоп келе жатып, бети-башын жуугандан кийин бычагын чоң таштын алдына катып коюптур. Ал кийин процессуалдык эрежелерге ылайык далил катары алынган» , - деди отставкадагы полковник.

Материал Ош ОИИБдин басма сөз катчысы Жеңишбек Ашырбаев менен бирге даярдалды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×