Бөлүмдөр
Жекшемби, 17-ноябрь
Ош облусу, Ош 28.09.2019 18:10

Ошто дагы бир чыгарма жарык көрдү

Turmush -  Кечээ, 27-сентябрь күнү Ош шаарындагы окуу жайлардын биринде жазуучу Жыргал Сулаймановдун «Өзүңдү изде» аттуу китебинин бет ачары өттү. Бул тууралуу аймактык кабарчы билдирди.

Китепке «Өзүңдү изде» романы, «Кара роза», «Төрайым», «Томпошка» аңгемелери кирген. Иш-чарада жазуучунун чыгармалары адабиятчылардын сынына коюлду.

Жыргал Сулайманов өзү китепти шашып чыгарганын жашырган жок.

«Жазуучуларга бир идея келип калса, ошону аягына чыгармайын кыйналып жүрө беришет. Мен да китепти баштап алып, ичимде топтоп жүргөндүн баарын төгүп, коомго тезирээк жеткирүүгө шашылдым. Романда бүгүнкү күндө жүрөктү ооруткан дин маселеси, бачабаздык, байлык, сүйүү маселелери көтөрүлгөн. Мени кыйнаган ойлорду кагазга жазып жүрүп чыгарма жаралды. Алгач айрым жазуучулардын сынынан өткөрдүм, кемчиликтерди айтышты, алар кийинки чыгармаларды жазууда эске алынат. Китептин аталышын алгач "Өзүңдү изден" деп койгом, бирок көпчүлүк бул кууш тема болуп калат деп айтышты. "Өзүңдү издеп" деп койсоң, кеңири тема болот дешти», - дейт Жыргал Сулайманов.

Ж.Сулайманов учурда банк кызматкери. Студенттер да аны менен баарлашууда банк кызматкери китеп жазууга кантип убакыт табарын сурашты. Жазуучу таңкы төрттө ойгонуп, жумушка барганча чыгармасын жазганын айтты.

Филология илимдеринин кандидаты, доцент Гүлина Жамгырчиева романдагы ар бир окуяны кайрадан повесть кылып жазып чыкса болот деген пикирин билдирди.

«Адабиятчылар дүйнөлүк адабият кандай өнүгүүдө, анын арасында кыргыз жазуучулары кандай деңгээлде келе жатат деп көз салып турабыз. Чыңгыз Айтматовдун көзү өткөнүнө 11 жыл болуптур. Учугун улай турчу жазуучуну күтүп жатабыз. Жаш жазуучулардын бири Жыргал Сулаймановдун китебин окуп чыктым. Жазуучу коомдогу бардык терс окуяларды жүрөгү менен кабыл алып, китепке баарын төгүп койгон. Көтөргөн темасы күчтүү», - деди Гүлина Жамгырчиева.

Китептин бет ачарына 250 адам катышып, 50дөй жазуучу конок болду.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×