Бөлүмдөр
Шейшемби, 22-октябрь
Баткен облусуЛейлек району 17.09.2019 18:19

Туугандарыныкына өздөрү кетишкен: Лейлектин Максат айылынын тургундары эвакуацияланган жок

Иллюстрациялык сүрөт
Иллюстрациялык сүрөт

Turmush -  Лейлек районундагы Максат айылынан 700 киши эвакуацияланды деген маалымат чындыкка дал келбейт. Бул тууралуу бүгүн, 17-сентябрда өкмөттүн Баткен облусундагы ыйгарым укуктуу өкүлчүлүгүнүн басма сөз кызматы билдирди.

Маалыматка караганда, жергиликтүү бийлик тарабынан жөнөкөй жарандарды эвакуациялоо иштери жүргөн эмес. Кечинде жергиликтүү тургундардын басымдуу бөлүгү коопсуздук үчүн жакынкы айылдардагы туугандарыныкына өздөрү кетишкен. Алар негизинен аялдар, кары-картаңдар жана балдар. Эртең менен айылдыктар өз үйлөрүнө кайра кайтып келе башташкан.

Өзгөчө кырдаалдар министрлигинин маалыматына караганда, жергиликтүү мектептин имаратына түндө 128 адам келсе, эртең менен мектепте 90 адам калган.

Мамлекеттик чек ара кызматынын 1 аскер кызматкери каза болду. 13 киши ар кандай жаракат алды. Алардын ичинен жетөө аскер кызматкери, алтоо жөнөкөй жаран. Баткен облусунан Бишкектеги травматология жана ортопедия илимий-изилдөө борборуна аскердик авиациянын жардамы менен 10 бейтап жөнөтүлдү.

Окуя тууралуу:

Буга чейин Кулунду айыл өкмөтүнүн жооптуу катчысы Өскөнбай Ташбалтаев кечээ, 16-сентябрда Лейлек районунун Кулунду айыл аймагынын Максат айылындагы чек арада ок атышуудан кийин аялдар менен жаш балдар коңшу айылдарга көчүрүлгөндүгүн билдирген.

Анын айтымында, Бешкент айыл өкмөтүнүн Эски-Оочу айылындагы А.Момунов атындагы орто мектебине 167 адам, Раззаков айылына 8 адам жеткирилген.

«Кечээ ок атышуулардан кийин Максат айылындагы тургундар өз үйлөрүн таштап чыгып кетүүгө мажбур болду. Алар менен сүйлөшүп, 167 адамды Эски-Оочу айылындагы мектепке, 32 адамды Булак-Башы айылына, 8 адамды Раззаков айылындагы бала бакчага жайгаштырдык. Кечээтен бери эл арасында тынчтыкты сактоо боюнча түшүндүрүү иштери жүрүп жатат. Бүгүн абал тынч. Кыргызстандын премьер-министри М.Абылгазиев келип, Максат айылынын тургундары менен жолугушту», - деген ал.

Баткендеги чек арада болгон окуялардын чоо-жайын бул шилтемеден окусаңыз болот.

Мамлекеттик чек ара кызматы бүгүн, 17-сентябрда Тажикстандын Согдий облусунун Гафур районуна караштуу Овчи-Калача калктуу конушунда Кыргызстан менен Тажикстандын чек арачыларынын жолугушуусу өткөндүгүн билдирди.

Түзүмдүн маалыматына караганда, жолугушууга кыргыз тараптан Мамлекеттик чек ара кызматынын төрагасынын биринчи орун басары, Башкы штабдын башчысы, полковник Абдикарим Алимбаев баш болгон өкүлдөр, тажик тараптан Улуттук коопсуздук комитетинин төрагасынын биринчи орун басары, Чек ара аскерлеринин кол башчысы генерал-полковник Раджабали Рахмонали баш болгон адамдар катышты. Алар Лейлек районуна караштуу Максат айылындагы чек арадагы абалды, кырдаалды турукташтыруу маселесин талкууга алып, мындан сырткары бирдиктүү иш алып баруу маселесин иштеп чыгышты.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×