Бөлүмдөр
Жума, 20-сентябрь
Нарын облусу, Нарын 12.09.2019 10:04 На русском

Оператор А.Дөөлөсбеков танк менен каякка барган? Сүрөт

Turmush -  Нарын телевидениесинде оператор болуп эмгектенип келе жаткан Апсамат Дөөлөсбеков бул жумушка дагы талант керектигин жана өтө кызыктуу иш экенин белгилейт. Аны менен аймактык кабарчы таанышты.

Апсамат Дөөлөсбеков 1989-жылы Нарын районуна караштуу Эмгекчил айылында туулган. 2007-жылы мектепти аяктап, Сатыбалды Нааматов атындагы Нарын мамлекеттик университетинен программист адистигин алып чыккан. Ал бала кезинде эле оператор болууну кыялданган. Үй-бүлөлүү, 4 бир туугандын улуусу.

Ысык-суукта калабыз

- Университетти бүткөн соң 1 жыл бош жүрдүм. 2013-жылы Нарын ТВга айдоочу болуп жумушка кирип, 1 жылдай иштедим. Андан кийин оператор болдум. «Телевидениенин тузу оор» деген чын. Орто жолдон көп эле жумуштар чыгып жатты. Кете албай, байланып жүрдүм. Биздин кесип абдан кызыктуу, эки жакка көп чыгабыз. Операторлор көп журналисттер менен иштейбиз. Ысык-суукта калабыз.

Кесиптештерди тамашага салып...

- Бир жолу узак жолго иш сапарга чыктык. Бир журналист, айдоочу, мен болуп баратабыз. Баарынын эле уктагысы келип жатат. Орто жолго жеткенде «тууй ата» десем, экөө «эмне болду» дешти. «Агай, флешкам калып калган турбайбы» дедим. Кайра артка кеттик. Бир топ жерге барганда «тамаша агай, флешка бар экен» дедим. Көңүлдөрүн ачып коеюн деп тамашалагам. Азыркыга чейин «ошондо убара кылгансың» деп айтышат.

Мени журналист деп ойлошуптур

- Таң атпай съемкага бармакбыз. Кыштын кыраан чилдеси. Кечинде кафеге баргам, костюм-шым, туфличенмин. Үйгө барып, кийим алмаштырганга жетишпей калдым. Жумушка келип эле ошол бойдон кеттим. Мен үчүн съемкага кечигип да калдык. Барганда 3 журналист уруш жешти. Кычырап кийинип турсам, элдин баары мени журналист деп ойлошту окшойт. Мага эле кайрылып жатышты. Ушу окуяны да азыркыга чейин айтышат.

3 мүнөттүк съемка үчүн 2 күн талаалап...

- Нарын ТВда Эсен деген журналист бала бар. Экөөбүздү Ак-Сай өрөөнүнө съемкага жөнөтүштү. Кыштын кыраан чилдеси. Мындан 3 жыл мурун кыш оор болгон. Ак-Сайдагы малчылар айылга түшө албай калышкан. Малчылардын абалын билүү, тамак-аш, чөп жеткирүү үчүн Ат-Башы районунун жетекчилиги, ӨКМдин жана башка түзүмдүн кызматкерлерине кошулуп барганбыз. Баарыбыз БТРге (танк) түшүп алып бардык. Чабандардын тамак-ашын, чөбүн жеткирип, кайра келе жатканда 1 танкыбыз бузулуп калды. Экинчисине баарыбыз түшүп алып келе жатабыз. Ал орто жолдо тыгылып калды. Унаа болсо дагы түртүп чыгарып кетмекпиз. Танк аңга тыгылып, дөңгөлөктөрү айланып тура берет экен. Ошол жакта калып калганбыз. Ачка болдук, суу жок. Бири-бирибизди көргүбүз келбейт. Танктын ичинде сыз, муздак, күйүүчү май жыттанат. Ошентип танкты араң жүргүзүп, 2 күн дегенде келгенбиз. Бир айга чейин күйүүчү май жыттанып калганбыз.

Бала кездеги кыял орундалды

- Мектепте окуп жүргөндө камера кармаган балдардын ишине кызыгып, «мен дагы ушинтип иштесем» деп койчумун. Көрсө, бала кезде эмнени кыялдансаң ошол келет экен. Азыр ошол кыялыма жетип иштеп жатам. Кудайга шүгүр, үй-бүлөм бар. Ушул кызматта туруп үй-бүлө багып жатабыз. Көп жерди көрүп, кызыктуу күндөр өтүп жатат.

Оператор болуу үчүн шамдагайлык, ыкчамдык керек. Кадрды ала билүү керек. Журналист суроо берип жатканда кулак түрүп, маани берип туруу шарт. Камеранын сүрү күчтүү. Кээ бир учурда сүйлөп жүргөн журналисттер деле камеранын сүрүнөн сүйлөй албай калышат. Карапайым кишилер гана эмес, чоңдор деле тайсалдап калышат. Оюн чачыратып жибергендер көп. Өзүбүз көтөрүп жүргөн камерадан өзүбүз деле сүйлөй албай калат экенбиз. Камеранын артынан көп элдер көрөт деген ой калып калса керек. Ошондуктан сүр болсо керек.

Келечектеги пландар

- 4 бир туугандын улуусумун. Ата-энем, иним айылда турушат. Бир карындашым турмушта, бир карындашым колумда. Нарында үй-бүлөм менен турам. Келинчегим бала бакчада тарбиячы болуп иштейт. Кесиби мугалим. Кудай буюрса, келечекте тойлорду тарткан студия ачып иштесемби деген пландар бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×