Бөлүмдөр
Дүйшөмбү, 16-сентябрь
Талас облусуТалас району 25.08.2019 22:35 На русском

Өзгөчө ысым: Б.Акматованын чыныгы ысымын жолдошу үйлөнгөндөн кийин гана билген (сүрөт)

Turmush -  Талас районундагы Көк-Кашат айылынын 37 жаштагы тургуну Баглан Акматованын ысымын жолдошу үйлөнгөндөн кийин гана билген. Аймактык кабарчы аны менен таанышты.

Өзүнүн айтымында, Талас районунун Каракол айылында төрөлгөн.

«Ата-энем ушундай ысым коюшуптур. Кыргыз элибизде мындай ат жок. Казак элинде көбүрөөк экен. Ата-энемден «эмнеге кызыктай ат коюп койгонсуңар?» деп далай сурачумун. Раушан деген эжем бар. «Анын атына уйкаштырып Баглан деп койгонбуз» дешкен. Мектепте окуп жүргөндө эжелер менен изилдеп көргөнбүз. Баглан деген шаар бар экенин билгенбиз (Афганистандагы шаар). Атымды уккандар таң калуу менен карашат. Өзүм да 2 жолу кайталап айтууну адатка айланткам. Себеби кайра-кайра сурашат. Мектепте окуп жүргөндө классташтарым «багалаң, баглан козу» деп көп айтышчу. Ал кезде чычалап уруша кетчүмүн.

Медициналык окуу жайдын акушерлик бөлүмүн аяктагам. Көптөгөн студенттер, мугалимдер менен таанышып калганда, «Баглан деги кандай ат?» деп кайра мага суроо беришчү. Көптөр таң калып, «кызыктай ат экен» дегенинен уялып, атымды Багыш деп койгом. Ошентип үйдөгүлөр Багыш дешет. Мектепте окуп жүргөндө паспорт алганда атымды өзгөртүп салсамбы деп ойлочумун. Паспорт аларга жакындаган сайын акыл-эс кирип ата-энем берген атты алып жүрөм дедим. Баары мени кандай тааныса ошол бойдон калам деп чечим чыгаргам.

21 жашымда турмуш курдум. Жолдошум менен атымды Багыш деп таанышкам. Баш кошуп калгандан кийин паспортумдан атымды окуп калып, «Атың Баглан турбайбы ээ? Кайрадан таанышып алалы» деп, көзүбүздөн жаш чыкканча күлгөнбүз. Ошентип жолдошум чыныгы атымды үйлөнгөндөн кийин билген. Күйөөм Баглан деп айтпайт. Кошуналарым Баглан десе «антпей эле Багыш деп айпайбы» деп калат. Ага чын атым жакпайт. «Атым сага жакпайт ээ?» деп күлүп калам.

Балдарыбызга Гүлнур, Адилет, Ариет деген ысымдарды койдук. Мендей болуп таң калдырып жүрүшпөсүн деп белгилүү аттардан эле ыйгардык», - деди ал.

Баглан-Багыш айым бош убакта кол өнөрчүлүк менен алектенет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×