Бөлүмдөр
Шаршемби, 23-октябрь
Талас облусуКара-Буура району 29.07.2019 14:11 На русском

Айыл турмушу: Кара-бууралык М.Жумагулов күн батареясын жасап, үйүндө ысык суу маселесин чечти (сүрөт)

Turmush -  Кара-Буура районуна караштуу Аманбаев айылынын 33 жаштагы тургуну Мирсланбек Жумагулов темир устачылык менен алектенип келе жатат. Аймактык кабарчы аны менен таанышты.

Өзүнүн айтымында, темир ширетүүнү өз алдынча үйрөнгөн. Кийин Бишкектен билим алып, унаа оңдоочу уста кесибине ээ болгон. Бирок ал кесиби менен иштеген эмес.

«Айылдын шартына ыктап, темир иштери менен алек болуп кеттим. Көп убакыттан бери ойлонуп, интернет булактардан идеяларды алып, күн нурунан кубат алчу батарея жасадым. 1 квадрат метр жерге 1 күн тийген нурдан 1 кВт энергия алынат. Ал 2 жылдан бери иштеп, бизде ысык суу көйгөй болбой калды. Аны профиль түтүктөрдөн жана жука темирден жасагам. 70 литр суу ысытуучу идишти газ баллондун сыртын жылуулап жасадым. Аны күн батареясы ысытып турат. Күн тийгенде батареядагы суу ысып, циркуляция башталат. Ал суу куюлган идишке барат. Кээде күн катуу ысып кеткенде суу кайнап, ташып кетет. Кечинде суунун ысыганы токтойт. Бирок суу түнү бою жылуу бойдон тура берет.

Үйдөгүлөргө «ысык суудан баттан алып тургула, муздак суу кирип турсун» деп айтам. Ал эми муздак суу алган насоско ток бир аз гана сарпталат. Суу 70 градуска чейин ысыйт. Кышкысын батареядагы сууну төгүп салам. Кайра күн жылып калганда аристонго кошуп иштетип коём. Апам «күн батареяңды интернетке жайгаштырып койбойсуңбу, эл көрүп жасап алып колдонушсун» деп айтып калат», - деди ал.

Уста алдыда талаада жулунган төө буурчакты жерден алып тазалай турган комбайн жасоону пландап жатат.

«Жумушту жеңилдеткен нерсе болсо идеялар жарала берет. Кудай мага элиме кызмат кылууга талант берген чыгар деп калам. Атам айыл элинин турмуш тиричилик техникаларын оңдочу. Ширетүүнү алгач үйрөнүп иштеп баштаганда далай жолу колдорумду күйгүзүп алгам. Азыр колум баарына чыдамдуу болуп калды (күлүп). Андан башка көптөгөн буюмдарды ширетип жасайм. Мисалы, 5 күндө дарбаза жасап коём. Шире сыккыч жасагам, эл күнүнө 20 кап алманы иштетип, шире даярдап кетишет. 1 кабына 100 сомдон акы алынат. Андан тышкары талаа шаймандарын айыл эли тааныш-билиш болгондуктан бекер ширетип жасап берем. Жыгачтардан дагы буюмдарды жасап көрдүм. Бирок темир иштерине жакынмын», - деди ал.

Темир уста 3 баланын атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×