Бөлүмдөр
Ишемби, 19-октябрь
Нарын облусуНарын району 06.07.2019 14:28 Жаңыланды: 03.08.2019 15:30 На русском

Айыл турмушу: Мугалим Ы.Эсенгулова кубалап жүрүп окуткан окуучусу кийин рахмат айткан (сүрөт)

Ырысбубу Эсенгулова
Ырысбубу Эсенгулова
// Turmush

Turmush -  62 жаштагы Ырысбүбү Эсенгулова 41 жылдан бери мугалим болуп иштеп келет. Аны менен аймактык кабарчы таанышты.

Ырысбүбү Эсенгулова 1956-жылы Нарын районуна караштуу Жылан-Арык айылында туулган. Кесиби математик. «Эл агартуунун отличниги» наамынын ээси. 2015-жылы КРнын «Ардактуу айым» наамына татыктуу болгон. Үй-бүлөлүү, 3 эркек, 2 кызы, 9 небереси бар.

«Эмгек жолумду 1978-жылы өзүм окуган Калыгул Жусупов атындагы орто мектептен баштадым. Ал жерде 1988-жылга чейин иштеп, андан кийин Учкун айылындагы Эшбай Токсобаев атындагы орто мектебине математика мугалими болуп келдим. Пенсияга 2008-жылы чыктым. Бирок азыркы мезгилге чейин аталган мектепте эмгектенип келе жатам.

Үйгө келгенде мектеп жакты карай берем. Себеби балдардын күлгөнү, кыйкырганы, ойноп жатканы угулат. Өмүрүмдүн бир бөлүгү балдар болуп калды», - деди ал.

Мугалим эсинде калган окуучуларын айтып берди.

«Батма деген окуучум бар болчу. Аябай шакылдаган, тың, жакшы окуган кыз эле. Математика факультетин окуп бүтүрдү. Кийин Жумгалга келин болду. Ошондо мага келип, «Жумгал боюнча мен эң мыкты, «дефицит» адисмин. Сиз мени жакшы окутуптурсуз» деди. Кийин каза болуп калды.

Союз кезде тартип катуу эле. Окуучулардын билиминин жыйынтыгын жума сайын чыгарып турчубуз. Сабакты көп калтырган бир окуучум бар болчу. 9-классты бүткөндө аны кесиптик окуу жайга алып барайын дедим. Ал окуучум макул деп, бирок барбай койду.

Бир күнү алып барайын десем талаалап качып кетти. Жолдошумдун мотоцикли бар болчу. Аны айдатып алып, артынан кубаладым. Ошентип баягы баланы кесиптик окуу жайга киргиздим. Ал тракторист-айдоочу адистигин алып чыкты.

Ошондон 2 жылдан кийин союз тарады. Ошол мезгилде Жылан-Арыкка бардым. Колумда баштыктарым көп болчу. Трактор келе жатыптыр. Бирок тоскон деле жокмун, өзү токтоду. Трактордун айдоочусу мени менен учурашып, жүктөрүмдү алып: «Жеткирип коеюн. Мени немис көргөнсүп кубалап, кесиптик окуу жайга алып бардыңыз эле» деди. «Нааразы болдуңбу?» десем, «жок, жакшы тракторист болдум. Сизге рахмат, бир кесиптин ээси болуп калдым» деди. Бирок ал окуучумдан уялып калдым», - деди мугалим.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×