Бөлүмдөр
Дүйшөмбү, 16-сентябрь
Ош облусу, Ош 10.06.2019 11:22 На русском

Ошто жыл башынан бери 6 эне төрөттөн кийин каза болгон. Дарыгерлер себебин түшүндүрүштү

Иллюстрациялык сүрөт
Иллюстрациялык сүрөт

Turmush -  Ош облусунда ара жана тубаса кемтик төрөлгөн балдардын саны өсүүдө. Бул тууралуу Ош шаарында өткөн тегерек столдун алкагында белгилүү болду, деп билдирди аймактык кабарчы.

3-июнь күнү өткөн тегерек столдо энелердин өлүмү, балдардын билим алуусу жана аларга карата зордук-зомбулук көйгөйлөрү талкууланган. Талкууга улуттук статистика комитетинин төрөгасы Акылбек Султанов, Ош облустук жана шаардык ооруканалардын жетекчилери, алардын орун басарлары, ошондой эле мэриянын өкүлдөрү катышкан.

Ош шаардык мамлекеттик статистика башкармалыгынын жетекчиси Азизбек Рысбаевдин айтымында, Ош шаары жана Ош облусу боюнча энелердин өлүмү беш жыл мурдагы көрсөткүчтөн азайган эмес.

«Кыргызстан боюнча 7 миң 200 үй-бүлөгө изилдөө жүргүзүлгөн. Изилдөө иштери 7 облуста жана 2 шаарда өткөрүлдү. Биз эне жана баланын өлүмү, төрөлгөн балдардын ден соолугу, алардын окууга болгон мамилеси, балдардын үй-бүлөдө зордук-зомбулукка кабылуусу, жашоо мүмкүнчүлүктөрү сыяктуу жалпы тогуз көйгөйдү камтыган сурамжылоо өткөргөнбүз. Ош шаарында 600 үй-бүлө сурамжылоого катышты. 18 жаштан жогорку курактагы кыз-келиндердин саны 2 миллион же Кыргызстандын калкынын 31 пайызын, ал эми балдардын саны 2,5 миллион же калтын 39 пайызын түзөт. Демек Кыргызстандагы калктын 70 пайызы — энелер жана балдар. Каза болгон энелердин көпчүлүгүн учурда чет өлкөдө иштеп жүргөн мигранттар түзүп жатат. Оор илдетке кабылган балдардын саны салыштырмалуу бир кыйла азайган», - деди Азизбек Рысбаев.

Ош шаардык үй-бүлөлүк дарыгерлер борборунун директорунун орун басары Суусар Сагынбаеванын айтымында, балдардын өлүмү азайганы менен ара жана тубаса кемтик төрөлгөн балдардын саны жылдан жылга өсүүдө.

«Балдардын өлүмү өткөн жылга салыштырмалуу 10 пайызга азайганы менен, ара же өлүк жана тубаса кемтик балдардын төрөлүшү жылдан жылга көбөйүп жатат. Негизи төрөлгөндөн кийин каза болгон балдардын көпчүлүгүн 1 кг салмакка жетпей, ара төрөлгөн балдар түзүүдө. Мунун бирден бир себеби — эненин кош бойлуу кезинде ар кандай ооруларга чалдыгышы, андан сырткары убагында дарыгерге кайрылбай, төрөт алдында гана дарыгерлерге кайрылып жаткандыгы. Мындай оорулуу, ара төрөлүп жаткан балдардын көбөйүшүнө сырты миграциянын дагы таасири чоң. Себеби энелер көпчүлүк учурда кош бойлуу кезинде дарыгерге кайрылышпайт. Ички миграцияда да мындай учурлар катталат», - дейт Суусар Сагынбаева.

Ал эми Ош облустук төрөт үйүнүн жетекчиси Гүлбара Кенжебаева төрөт учурунда каза болгон энелердин саны эмне үчүн кыскарбай жатканына токтолду.

«Биз энелердин өлүмүнүн санын кыскартуу үчүн колдон келген аракеттерди жасап жатабыз. Көрсөткүчтүн азайбай жаткандыгынын негизги себептери — бул үй-бүлөдөгү социалдык абал деп эсептейбиз. Себеби Ош облусу боюнча жакыр жашаган үй-бүлөлөрдүн саны облустагы калктын 37 пайызын түзөт экен. Бул жакыр, шарты жок учурда боюна бүтүп, текшерүүдөн өтпөй, төрөт учурунда гана кайрылган энелер аз кандуулук жана ар кандай оорунун себептеринен каза болуп жатат деген сөз», - деди Гүлбара Кенжебаева.

2018-жылы Ош облусунда 4 эненин өлүмү катталган. Ал эми ушул жылдын башынан бери 6 эне каза тапкан. Аталган 6 учурдун ичинен төрт эне аз кандуулук жана төрөт учурунда өлүмгө алып келүүчү дарт менен ооругандыгы аныкталган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×