Бөлүмдөр
Жекшемби, 20-октябрь
Ош облусу, Ош 30.05.2019 17:56 На русском

Өзгөндө 6 балалуу жалгыз бой эне стадиондун эски кароолканасында күн кечирүүдө. Видео

Өзгөндө стадиондун кароолканасында уул-кыздары менен жашап жүргөн эне
Өзгөндө стадиондун кароолканасында уул-кыздары менен жашап жүргөн эне

Turmush -  Ош облусунун Өзгөн районунда 6 балалуу болгон эне стадиондун кароолканасында жашап жүргөнү аныкталды. Бул тууралуу Ош облустук ички иштер башкармалыгынын басма сөз кызматынан билдиришти.

Маалыматка ылайык, кечээ, 29-май күнү Ош облусунун Алай (Сопу-Коргон), Чоң-Алай (Жекенди), Араван (Нур-Абад), Ноокат (Кыргыз-Ата), Кара-Суу (Сары-Колот) жана Өзгөн районунун (Кароол) айыл өкмөттөрүндө укук бузууларды алдын алуу боюнча иш-чара өткөрүлгөн. Ага билим берүү, саламаттыкты сактоо, социалдык коргоо, өзгөчө кырдаалдар министрликтеринин, ошондой эле укук коргоо, фискалдык саясат, мамлекеттик каттоо, суу чарба жана башка мамлекеттик мекеме, ишканалардын өкүлдөрү катышкан.

Иш-чаранын жүрүшүндө жарандар тарабынан жалпысынан 208 ар түрдүү көйгөйлөр айтылган. Тактап айтканда ички иштер органдарына 3, саламаттыкты сактоо багытында 15, билим берүү багытында 3, социалдык маселелер боюнча 54, жергиликтүү өз алдынча башкаруу органдардын жана коммуналдык кызматтардын ишмердигине байланыштуу 76, мамлекеттик каттоо кызматына тийиштүү 24, өзгөчө кырдаалдар министрлигине 9, салык кызматына 2, электр тармактарына байланыштуу 21 көйгөй айтылган.

Алардын ичинен Кара-Суу районунун Сары-Колот айыл өкмөтүндө социалдык жѳлѳк пул жана жер тилкелерине муктаждыгы бар жарандар бар экени белгилүү болду. Ошондой эле электр чубалгылардын, мамылардын, мектептердин начар абалда экендигии жана тургундарда документ алууда маселелер жаралып жаткандыгы айтылды.

Андан тышкары Ѳзгѳн районунун Кароол айыл өкмөтүндө элди таза суу менен камсыздап, жолдорго асфальт тѳшѳп берүүнү жана жардамга муктаж жарандарга кѳмѳк кѳрсѳтүүнү суранышты. Кароол айылындагы футбол ойноочу жайдын кароолканасында 6 балалуу болгон 60 жаштагы жалгыз бой эне жашап жатканы белгилүү болду. Ал 20 жаштагы оорукчан баласы жана бир кызы, 2 небереси менен чогуу оор абалда күн кечирип келүүдө. Эненин турак үйү жок. Көп жылдардан бери жер ала албай келет. Күйөөсү экөө Казакстанда иштеп, 2012-жылы Кыргызстанга кайтып келгенде жолдошу оорудан улам каза болуп калган. Анын 4 кызы жана 2 уулу бар. 4 кызы турмушка чыккан, бирок жакында эле бир кызы күйөөсү каза болуп калгандыктан, жашаганга жери жок 2 уулу менен Казакстандан апасына келген. Эненин колунда дагы өзүнүн 2 уулу бар. Анын бирөөсү 20 жашта, 2-топтогу майып. Бирөөсү 15 жашта, мектепте окуйт. 60 жаштагы жалгыз бой эне үй-бүлөсү менен 1 жылдан ашуун таштанды таштоочу жайда жашап, 2012-жылдан бери ар жерде көчүп-конуп жүргөн.

Ал эми Ноокат районунун Кыргыз-Ата айыл өкмөтүндө жѳлѳк пул, пенсия, жер тилкесин алуу, таза суу боюнча маселелер айтылды. Ушундай эле маселелер Араван районунун Нур-Абад айыл өкмөтүндө дагы көтөрүлүп, жергиликтүү тургундар унаалардын ылдамдыгын азайтуучу дѳнсѳѳлѳрдү орнотууну жана жол, тротуарларды оңдоп берүүнү суранышты.

Алай районунун Бүлѳлү айыл өкмөтүндө таза суу, жолдордун начардыгы, мектептин авариялык абалы тууралуу сөз болуп, тургундар жолдорду жарыктандырып берүү боюнча сөз кылышты. Чон-Алай районунун Жекенди айыл өкмөтүндө дагы бир катар социалдык маселелер көтөрүлүп, айыл өкмөткө ФАП кызматкерлери жетишпей жаткандыгы жана күйүүчү майлардын баасынын өсүп жатышы боюнча маселелер талкууланды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×