Бөлүмдөр
Шейшемби, 16-июль
Нарын облусуЖумгал району 21.05.2019 13:20 На русском

«8 миллион сом эмне болду?»: Жумгалда мектеп курган «Авангард-Стройдун» жетекчиси кармалды

Ногойбаев атындагы мектеп
Ногойбаев атындагы мектеп
// Turmush

Turmush -  Нарын облусунун Жумгал районунун Чаек айыл өкмөтүндө Отунчу Ногойбаев атындагы орто мектебинин жаңы имаратын куруп жаткан курулуш компаниясынын жетекчиси камакка алынган. Бул тууралуу Жумгал райондук билим берүү бөлүмүнүн башчысы Фатима Өмүралиева билдирди.

«Мектептин айрым бөлүктөрү сапатсыз курулган экен. Мындан улам «Авангард-Строй» курулуш компаниясынын башкы директору Т.Т. менен техникалык көзөмөлдөөчү Н.К. камакка алынган. Ал эми Н.К. 2 айга үй камагына чыгарылды.

Жаңы имаратта табылган кемчиликтер чекесинен жасалып, оңдолуп жатат. Курулуш иши толук бүтсө, окуучулар жаңы мектепке кирип, билим алууну улантышар эле. Ушул учурда мектептин өрт коопсуздугун камсыз кылуучу жабдыктар орнотулуп, жасалып жатат. Бир аз болсо да иш башталып, быйыл күздө пайдаланууга берүүгө үмүт кылуудабыз», - деди Ф.Өмүралиева.

УКМКнын Нарын облусундагы башкармалыгынын тергөө кызматында Нарын облустук капиталдык курулуш башкармалыгынын жана «Авангард-Строй» ЖЧКсынын жооптуу кызматкерлерине байланыштуу сотко чейинки өндүрүштүк иштер жүрүп жатат.

УКМКнын басма сөз кызматынын маалыматына караганда, аталган кызматкерлер Жумгал районунун Чаек айыл өкмөтүндөгү Отунчу Ногойбаев атындагы орто мектебинин жаңы имаратын куруу учурунда мамлекетке ири өлчөмдө зыян келтиришкен.

2014-жылы Нарын облустук капиталдык курулуш башкармалыгы менен «Авангард-Строй» ЖЧКсынын ортосунда өткөрүлгөн тендердин жыйынтыгы менен Отунчу Ногойбаев атындагы орто мектебинин 275 орундуу жаңы имаратын куруу жөнүндө келишим түзүлгөн. Жаңы имараттын сметалык баасы — 64 млн 844 миң сом. Келишимдин негизинде курулуш иштери 2016-жылдын ноябрь айында аяктамак.

«Бирок Нарын облустук капиталдык курулуш башкармалыгы менен «Авангард-Строй» ЖЧКсынын жооптуу кызматкерлеринин мыйзамсыз иш-аракеттеринин кесепетинен жаңы имаратты куруу учурунда мамлекетке 8 143 716 сом өлчөмүндө зыян келтирилген.

Окуучулар 4,5 жылдан бери өмүрүн тобокелдикке салып, Отунчу Ногойбаев атындагы орто мектебинин эски имаратында билим алып келишет. Бул мектеп 1972-жылы курулган, авариялык абалда.

УКМКнын Нарын облусундагы башкармалыгы тарабынан Нарын облустук капиталдык курулуш башкармалыгынын жооптуу кызматкери кармалган. Бирок 2019-жылдын 15-майында Нарын шаардык соту аталган шектүүнү камакка алуудан баш тарткан. Шектүү сот залынан бошотулуп, үй камагына алынган.

Ошол эле учурда сотто мамлекетке 8 143 716 сом зыян келтирилгени жана мектептин жаңы имараты аягына чейин бүтпөгөндүгү эске алынды», - деп айтылат маалыматта.

-----------------------------------------------------------------------

Нарын облусунун Жумгал районунун Чаек айылында 2016-жылдан бери курулуп жаткан 275 орундуу Отунчу Ногойбаев атындагы орто мектеби 2 жылдан бери пайдаланууга берилбей, 600 окуучу чатыры тешик эски мектепте окуп жатышат. Бул тууралуу окуучулардын ата-энелери билдиришти.

Алардын айтымында, мектеп 2017-жылы эле күзүндө курулуп бүтүп, ишке берилмек. Өкмөттүн тапшырмасы, долбоордун мөөнөтү ушундай болгон. Бирок 2 жыл өтсө да мектеп пайдаланууга берилбей келет.

«Өкмөттөн мектепти курууга жалпы 68 млн сом каралган. Анын учурда 66 млн сому толук которулуп берилген. Бирок тилекке каршы учурда 2 млн сому калган, ошону которушса бүтөт деген куру шылтоолор менен элди алдап келишет. Мектеп сапатсыз курулуп, аны комиссия да текшерип келет. Анын корутундусу азырынча чыга элек. Мектепке президенттик шайлоонун алдында президентибиз С.Жээнбеков келип, өзү көрүп, мектеп ошол жылы эле толук бүтүп, пайдаланууга берилет деп кеткен. Бирок, ал убада аткарылган жок. Азыр балдар, неберелерибиз ат сарайдан айырмасы жок мектепте тыгылып окуп жатышат», - деди пенсионер Жумакан Турсунбаева.

Мектептин окуу тарбия иштери боюнча бөлүмүнүн башчысы Улан Эсенгелдиевдин айтымында, 1 үстөлгө 2 окуучу, 1 партага 3-4 бала отуруп сабак окушат.

«Канча жылдан бери жасап, шыбап келсек деле эски мектебибиз жарабай калды. Жаңы мектеп пайдаланууга берилсе жакшы болмок. Азыр эки корпуста окуп жатабыз. Үч корпус болчу анын бирин бала бакчага беришкен. Ар бир класста 30дан бала бар, парталар сынган, эски, отургучтар жетишпей, бир үстөлгө экиден окуучу отурушат, бир пардага 3-4 окуучу отурат. Пайдубалы чөгүп кеткен, терезелери сынып, чатырынан тамчы тамат. Жыл сайын жакында бүтөрүн айтышат, бирок аягына чыкпай келет. Көп эле комиссия келип, текшерип кетип жатышат. Жаңы мектеп бүтүп, пайдаланууга берилсе болмок», - деди ал.

-----------------------------------------------------------------------

Жалпы 68 млн сомго курулуп жаткан Жумгал районунун Чаек айылындагы Отунчу Ногойбаев атындагы орто мектебинин жаңы имараты келишим боюнча 2017-жылы пайдаланууга берилмек. Бирок, тилекке каршы учурда мектептин жаңы имаратынын дубалдары чирип, кар менен кошо салынган тепкичтер жарактан чыккан. Бул тууралуу аймактык кабарчыга мектеп жамааты билдирип, нааразы болушту.

Мугалимдердин айтымында, жаңы имарат мындан 4 жыл мурун салынып баштаган.

«Мектепти жайы, кышы тынбай жасап жатышты. Акыркы төрт жылдан бери бүтпөй койду. Кыштын кыраан чилдесиндеги декабрь айында да цементтеп жатышты, өзүңөр көргөндөй кар менен кошо салынган тепкичтер, пайдубалы ээрип калды. Азыркы учурда бир дагы жумушчу жок, мектеп бек турат. Үмүтүбүз деле калбай калды. Эски, тар имараттарда 2-3 кезмет менен балдарды окутуп, эс алууга тараттык. Мындай көрүнүш менен быйыл да бүтпөйт окшойт. Азыр дубалдары чирип, кар менен кошо салынган тепкичтер жарактан чыкты. Ичине кирип көрө албайбыз, жаап алып иштешет. Ичинде да көп кемчиликтер бар. Биздин мектеп аябай эле сырдуу мектеп болду», - деп билдиришти мугалимдер жамааты.

Ал эми мектеп директору Сүйөркул Бойтоев кайрылбаган жери калбаганын, арызданганда деле майнап чыкпай жатканын билдирди.

«Мектеп 2017-жылдын август айында ишке берилмек. Күттүк, берилген жок. Окуу жылдын аягы деди, анда да жок. Эми минтип эч кимиси жок, өкмөттөн да жооп жок. Жалпы 275 орунга ылайыкталган мектеп 2-кабаттуу болуп курулган. Ата-энелер, мугалимдер жамааты тынчсызданып жатышат», - деди С.Бойтоев.

Бул маселе боюнча райондук билим берүү бөлүмүнүн башчысы Фатима Өмүралиева мектеп ушул жылы толук бүтүп, ишке бериле турганы боюнча маалыматтар бар экенин жана сапатсыз курулуп, урап, бузулуп жаткан жерлерин комиссия текшере турганын билдирди.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×