Бөлүмдөр
Дүйшөмбү, 16-сентябрь
Чүй облусуКемин району 03.05.2019 23:40 На русском

Элдик уламыш: Махабаттын айынан курман болгон кыз-жигит

Turmush -  Чүй облусуна караштуу Боом капчыгайында эки тоонун ортосунда жайгашкан чакан айыл Кыз-Күйөө деп аталат. Эмне себептен Кыз-Күйөө аталганына аймактык кабарчы кызыгып көрдү.

Айылдыктардын айтымында, аталышы ата-энесинен качып, үй-бүлө куруп, ушул жерде байырлап жашап калган жаштардын урматына коюлган. Ал эми айрым уламыштарда такыр башкача айтылат.

Илгерки заманда Ысык-Көлдүн Тоң тарабында бир каардуу байдын ашкан сулуу кызы болуптур. Ал кыз менен байдын жылкычысы бири-бирин сүйүп калышат. Кызды алууга калыңы жок, калың төлөгөн күндө да кедей жигитке бай кызын бермек эмес. Эмне кылыштын айласын таппаган эки жаш күйүп жүрө беришет. Жигит байдын кызы күйөөгө узамак болгонун угат. Кыз менен жигит айлуу түндө жолугушуп, алыска качып кетмекчи болушат.

Бирок убагы келе электе эле кызды кудалаган байдын уулу кызды алып кеткени келип калат. Алар конок болуп жатканда жигит жылкыларынын арасынан эки мыкты атты тандап, токуп минип, кызды алып качат.

Жигиттин туугандары Чүй жакта болгондуктан, ошол жакты карай бет алышат. Аңгыча кызды издеп таппагандар жигит менен качканын сезишет. Артынан 30-40 адам кууп жөнөйт. Күлүк ат менен чыккан куугунчулар улам жакындай баштайт. Эптеп кызды куткаруу максатында Боом капчыгайынын ичиндеги эки асканын жанына келгенде, бирөө оң жаккы бетке, экинчиси сол жаккы бетке качышат. Алды-артынан тосуп чыккан куугунчулар экөөнү тең кармап алышат. Байдын ачуусу келип экөөнү тең өлтүрүп, салууга буйрук берген. Ошентип, кыз-жигитти ошол жерде өлтүрүп, сүйүүнүн айынан курман болгон эки жаштын күнөөсүз канынан эки булак жаралыптыр деген имиш бар. Булак сызылып агып чыккан ошол жер Кыз-Күйөө деп аталып калган экен. Кээ бир адамдар кызды Каптагай деген байдын кызы экен дешет. Ошол күндөн бери бул жерди элдер ыйык тутуп, мазар катары зыярат кылып, куран окуп өтүшөт.

Кийин 1951-жылы Бишкек—Рыбачье темир жолун тейлеген кызматкерлер үчүн Боом капчыгайындагы эки тоонун ортосуна чакан айыл түптөлгөн. Ал Кыз-Күйөө айылы деп аталып калган.

Айыл Кыргызстандагы эң кичине айыл, 23 гана түтүн жашайт. Башкача айтканда 105 жашоочу бар. Кыз-Күйөө айылынын аянты болгону 2,5 гектарды түзөт. Айыл тургундарынын айтымында, айылдын жашоосу шаардыктардыкынан кем калбайт. Үйлөр согуш жылдарында темир жолчуларга деп салынган. Азыр ар бир үй менчиктештирилген. Үйлөрдүн сырты жупуну көрүнгөнү менен ичи заманбап жасалгаланган. Ичинде ысык, муздак суу чыгат, электр жарыгы өчпөйт, телефон, сыналгы, интернет дайыма иштеп турат.

Бул айылда жашагандар темир жолдо рельс оңдоо, таштарды түшүрүү, тазалоо сыяктуу жумуштарды аткарышат. Айылдагы 20 чакты окуучу коңшу турган Кызыл-Октябрь айылына барып окушат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×