Бөлүмдөр
Шейшемби, 22-октябрь
Ысык-Көл облусу 24.01.2014 15:27

Ысык-Көл аймагында комедия жанрындагы жаңы тасма тартылды

Turmush -  Кечээ, 23-январдан баштап «Пофессорду издегиле!» («Ищите профессора!») аталышындагы комедия жанрындагы жаңы тасма элге көрсөтүлүп баштады жана 10 күндөн кийин өлкөнүн бардык аймактарында көрсөтүлүп баштайт, деп билдирди тасма тартуучу топ бүгүн, 24-январда АКИpress агенттигиндеги маалымат жыйында.

«Учурда кыш мезгили, сырт суук болуп турганда тасмадагы Ысык-Көлдүн жайкы көрүнүшү элге позитивдүү маанай тартуулайт», - дейт тасманын көркөм жетекчиси Нурлан Найманбаев.

Бул тасма «Ысык-Көл Films» кинокомпаниясынын алгачкы эмгеги болуп, тартуу иштери 2013-жылдын жай мезгилинде Ысык-Көл облусунун аймагында жүргөн.

Тасманын сюжети үч кыз менен үч баланын башынан өткөргөн күлкүлүү окуяларды камтыйт. Башкы каарман Орусиядан келген кабарчы Алтынай манилүү маек куруу үчүн Кыргызстандан профессор издегени тасманын негизи болот.

Күтүлбөгөн бурулуштар үч кыз менен үч жигитти бириктирип, достук, адамкерчилик, жардамдашуу сыяктуу адамдын жашоосундагы баалуу нерселерге басым жасайт.

«Бул тасма алкоголизм, тамеки сыяктуу терс көрүнүштөрдөн алыс болуп кенен аудиторияга, тактап айтканда үй-бүлө менен бирге көрүүгө болот», - деди тасманын режиссеру Нурбек Тониев.

Ал эми, тасмадагы актерлор кастинг жолу менен тандалып алынган. «Актерлорду кастинг жолу менен 400гө жакын талапкерлердин ичинен тандап алдык. Баш каармандын ролунда Айжана Аденова ойноду», - деп кошумчалады Н.Тониев.

Тасманын сценарийин Аскар Карасаев менен Талант Жумабаев жазган жана продюсерлик милдетти Руслан Осмоналиев аткарган.

Ал эми, тартуу иштерине 2 айга жакын убакыт жана 50 миң доллар каражат сарпталган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×