Бөлүмдөр
Шейшемби, 16-июль
Нарын облусуЖумгал району 12.01.2019 13:24 Жаңыланды: 12.01.2019 15:39

Чаекте турак үйлөрдү суу каптап жатат (сүрөт, видео)

Turmush -  Таза суу берилүүчү жайда абал туруктуу болбой, суу ташып, айыл тургундарынын үйлөрүн каптап жатат. Бул тууралуу Жумгал районуна караштуу Чаек айылындагы Ак-Татыр чөлкөмүнүн Асанкан уулу Асанбек атындагы көчөсүнүн тургундары айтып чыгышты.

Айыл тургуну Өзгөрүш Дүрүкбаевдин айтымында, таза суу берилүүчү жайдан ашып аккан суу үйүн, короо-сарайынан бери каптап, пайдубалына чейин кирип кеткен. Алар жыл сайын бул маселе боюнча айыл өкмөткө кайрылып келишет, бирок эч кандай жыйынтык боло элек. Суу акыркы 2-3 жылдан бери кышкысын бир маал каптайт.

«Ак-Татыр айылынын таза суу берилүүчү бөлүгүндө чуңкурча сууга толуп, айылды каптап жатат. Акыркы 2-3 жылдан бери ушундай. "Арыз жазгыла, аны биз 14 күндө карайбыз" дешти. Жылда арыз жаза берип, жыйынтык деле чыккан жок. Эмне кылып, каякка кайрыларыбызды билбейбиз», - дейт Ө.Дүрүкбаев.

Ал эми айыл тургуну Мээрим Бөйтөева бир көчөнү толугу менен суу каптаганын айтып кейиди. «Бизге айыл өкмөтү 14 күндө жооп беребиз деп тим болушту. Үйгө кире албай калдык. Короо-сарайды айтпай эле коёлу, үйүбүздүн дубалдарынан жарака кетти. Аймактарды ушинтип өнүктүрөбүзбү?», - деди ал.

Ал эми Чаек айыл өкмөтүнүн башчысынын милдетин аткарып жаткан Айгүл Токтоналиева таза сууга жооптуу адистерге тиешелүү тапшырмалар берилерин билдирди.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×