Бөлүмдөр
Бейшемби, 18-июль
05.01.2019 12:19 На русском

Милиция кызматкери Ж.Адылбеков асыл тукум жылкыны уурдаган адамды кантип кармаганын айтып берди (сүрөт)

Turmush -  Жакшыбек Адылбеков 1987-жылы Сокулук районуна караштуу Сокулук айылында төрөлгөн. Ал Сокулук райондук мамлекеттик администрациясы тарабынан уюштурулган сынакта «Жылдын мыкты ички иштер кызматкери» болуп тандалды. Жакшыбек Адылбеков аймактык кабарчыга жумуш үстүндөгү эсте калган окуясын айтып берди.

«Милиция кызматкерлери коомдук тартипти көзөмөлдөп, элдин коопсуз жашоодо өмүр сүрүүсү үчүн жаны менен берилип иштейт. Ошол себептен биздин иш убактыбызда көптөгөн кызыктуу окуялар болот. Ошондой окуялардын бирин айтып берсем, 2-3 жыл мурун болгон окуя. Кеч күз кирип калган. Айлана нөшөрлөгөн жамгырдан кийин ылай, суу болуп турган. Сокулук районунун алыскы Арал айылында үч жашар асыл тукум жылкы уурдалып, бизге бул тууралуу кабар келип түштү. Ошондо кылмышкердин изине түшүү үчүн районду эки күн бою тынбай кыдырып, айланып чыктым. Мал кармаган сарайларды тегиз тинтип, өз ишибизди ирети менен жасап жаттык. Күбөлөр талаада кароосуз калган сарайга жылкы жетелеп белгисиз киши киргенин айтышты. Ошентип из менен барып, жанагы сарайга кирсем эле баягы жылкы акырда байланып турат. Мени көрүп кошкурунуп үркүп кетти. Мен алгач ууру жылкыны байлап коюп качып кеткен го деп ойлогом. Жылкыга жакындап калганымда кылмышкер чөп салган акырга жатып алыптыр. Ылай жерлер менен баргандыктан буттарым оор болуп калган. Кылмышкер туруп качып кетерде болгон күчүм менен секирип, аны басып жыгылдым. Ошентип кылмышкерди кармап, жылкыны жетелеп жолго чыктым. Кийимимдин баары ылай болгон экен. Аны мен кийин байкадым», - деди ал.

Жакшыбек Адылбеков: «Милиция кызматын тандаганымдын себеби, 2007-жылы Сокулук райондук аскер комиссариатына барып, 702-полкунда кызмат өтөгөндөн бери милиция кызматын жактырып калдым. Ошодон бери формадабыз. Бала кезде салык кызматында иштесем экен деп тилек кылчумун. Ал болбосо да милиция кызматкери болдум.

Мекенибизде тынччылык жана элибиз, жерибиз өнүккөн өлкөнүн катарында болсо деп тилек кылам. Ар бир үйдө жакшылык болушун каалайм», - деди.

Милиция кызматкери үй-бүлөлүү, бир уул, бир кыздын атасы.

«Улуу балам Бексултан 8 жашта, учурда 2-класста окуйт. Андан кийинки кызым Нурайым 3 жашта, бала бакчага барат. Келинчегимдин аты Света мугалим, башталгыч класска сабак берет», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×