Бөлүмдөр
Шейшемби, 22-октябрь
Баракелде, Бишкек 24.03.2016 17:45

2015-жылдагы парламенттик шайлоодогу мүчүлүштүктөр Бишкекте өтүүчү эл аралык конференцияда талкууланат (фото)

Turmush -  Жогорку Кеңештин төрагасы Асылбек Жээнбеков бүгүн, 24-мартта БУУнын башкы катчысынын атайын өкүлү, Борбор Азия өлкөлөрү үчүн превентивдүү дипломатия боюнча аймактык борборунун башчысы Петко Драгановду кабыл алды. Бул тууралуу ЖКнын басма сөз кызматы билдирди.

Жолугушууга БУУ тутумунун Кыргызстандагы туруктуу координатору Александр Аванесов, Борбор Азия өлкөлөрү үчүн превентивдүү дипломатия боюнча аймактык борборунун саясий маселелер жана адам укуктары боюнча координатору Жером Буйжу, жана ушул эле борбордун Кыргызстандагы өкүлү Мирлан Мамыров катышты.

Тараптар Кыргызстандын туруктуу өнүгүшүнө, аймактык коопсуздук жана азыркы чакырыктарга каршы аракеттенүүгө байланыштуу маселелердин кеңири чөйрөсүн талкуулады. Жолугушуунун катышуучулары чек ара аймагындагы кызматташтык, чек араларды делимитациялоо, коңшулук принциптерге негизделип чечилүүчү жана өз ара урматташуу маселелери боюнча пикир алышты.

А.Жээнбеков БУУнун Кыргызстандын көз карандысыздык жылдарында көрсөткөн көмөгү үчүн ыраазычылык билдирди. Ошондой эле, шайлоо мыйзамдарын өркүндөтүү боюнча иштер сөзсүз улантылаарын белгиледи.

«2015-жылдын 4-октябрындагы шайлоодо, албетте, айрым бир кемчиликтер кетти. Биз аларды талдоо алдык, бүгүнкү күндө андай мүчүлүштүктөрдү жоюунун үстүндө иштеп жатабыз. Бул иштерде биздин эл аралык өнөктөштөрүбүздүн колдоосу эсепке алынууда. Бул маселелердин баарын КМШ ПАА менен бирдикте үстүбүздөгү жылдын 17-июнунда Бишкек шаарында өткөрүү мерчемделип жаткан «Демокартияны өнүктүрүү: шайлоо кампанияларынын тажрыйбалары, мыйзамдар менен жаңы технологиялардын шайлоо процессиндеги ролу» деп аталган эл аралык конференцияда ийне-жибине чейин талкуулоо планыбыз бар», - деп кошумчалады А.Жээнбеков.

Андан тышкары, экстремизм жана терроризм менен бирдиктүү күрөшүү темасына токтолгон Жогорку Кеңештин төрагасы, бул багыттагы БУУнун чечүүчү ордун баса белгиледи. Ал БУУнун Глобалдуу контртеррористтик стратегиясын Кыргызстан колдой турганын айтты.

Өз кезегинде П.Драганов парламенттик демократияны куруу боюнча Кыргызстандын бийлигинин умтулуусу менен күч-аракеттерин БУУ колдой турганын белгиледи. «Силер туура жолдо баратасыӊар, ийгиликтерди каалайм. Кыргызстандын өнүгүү мүмкүнчүлүгү абдан чоң»,- деди ал.

Тараптар БУУнун Кыргызстандагы Тынчтык куруу фондунун долбоордук ишмердүүлүгүнө оң баа беришти. БУУ тутумунун Кыргызстандагы туруктуу координатору А.Аванесов БУУнун Тынчтык куруу фондунун багыты боюнча айрым чек ара долбоорлору 2016-жылдан кийин дагы узартыла турганын маалымдады.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×