Turmush — Баткен районунун Бужум айылынын 26 жаштагы тургуну Умарбек Мажитов устачылык менен алектенет.
У.Мажитов Turmush басылмасынын кабарчысы менен болгон маегинде билдиргендей, анын устачылыкка аралашканына 3 жылдын жүзү болду.
«Мен негизинен Баткен облусунун жашоочулары үчүн керектүү болгон буюмдарды жасаганга аракет кылам. Алардын эң негизгиси деп өрүк салууга үкөктөрдү, камыр жаюуга арналган тактайчаларды, стол, тапчан жана селкинчектин түрүн жасайм», - деди Мажитов.
Ал жасаган үкөктөр 200 сомдон, камыр жайыла турган тактайчалар өлчөмүнө жараша 200-300 сомго, стол 800-1000 сомго, тапчандын ар кандай түрлөрү 5-20 миң сомго жана селкинчектер 7-25 миң сомго чейин бааланат.
У.Мажитовдун айтымында, ар бир буюмду жасоодо чыгармачылык менен иштөөгө аракет жасайт. Ошондой эле, жаңы буюмдарды жасоону интернеттен көрүп үйрөнөт. Андан сырткары, ал 2 адамды иш менен камсыз кылып, иш орунун түзүп берген.
Тапкан кирешеси үй-бүлөсүн бакканга жете тургандыгын белгиледи. Учурда ал бир баланын сүйүктүү атасы.