Turmush — Жалал-Абад облусунда мыйзамсыз баңгизаттарды сатып жүрүүгө шектелген 4 адам кармалды. Бул тууралуу бүгүн, 11-яянварда Жалал-Абад ОИИБдин басма сөз кызматы кабарлады.
Маалыматка караганда, 4-январь күнү милицияга Жалал-Абад облусунун аймагында К аттуу жаран мыйзамсыз баңгизатын сактап, колдонуп, жүргөндүгү тууралуу ыкчам маалымат түшкөн. Аталган маалымат Ноокен РИИБде Кылмыш-жаза кодексинин 283-беренеси (баңгизат каражаттарын, психотроптук заттарды жана алардын аналогдорун сатып өткөрүү максатысыз мыйзамсыз даярдоо) менен катталып, кылмыш иш козголгон. Иликтөө иштеринин негизинде кылмышка шектүү катарында Ноокен районунун 1964-жылы туулган тургуну К.Д. жана ага шерик болгон 3 адам кармалды.
Тергөөнүн жүрүшүндө алар Ноокен районунун 1964-жылы туулган К.Д., Кочкор-Ата шаарынын 1985-жылы туулган У.С., Майлуу-Суу шаарынын 1976-жылы туулган Д.А. жана 1992-жылы туулган А. уулу А. аттуу жарандар экени такталып, салмагы 500 граммдан ашык марихуана баңгизаты алынган. Алар Ноокен райондук соту тарабынан бөгөт коюуу чарасы тандалып алынып, эки айга камакка алынган.
Майлуу-Суу шаарынын 1976-жылы туулган тургуну Д.А. буга чейин соттолуп, Токтогул шаарындагы №52 жатак абагында кармалып жазасын өтөп жатып, кайрадан кылмыштуу шериктери менен кылмыш жасаган.
Учурда тергөө амалдары улантылууда.
