Бөлүмдөр
Бейшемби, 18-июль
Ош облусу 29.01.2014 18:43

Сүрөтпортаж - Ош облусунун аймагындагы көпүрөнү курган компаниянын жетекчилигине кылмыш иши козголду

Turmush -  КР ИИМинин мыйзамсыз кирешелерди легалдаштырууга каршы күрөшүү башкармалыгы менен Ош облусунун прокуратурасы тарабынан Ош облусунун аймагындагы транспорттук түйүндөрдү курууда жасалган мыйзам бузуу фактыларынын бети ачылды. Бул тууралуу ИИМдин басма сөз кызматы билдирди.

Маалымдалгандай, 2013-жылы Кара-Кулжа районунда Ылай Талаа — Гүлчө унаа жолдору боюнча Күлөжүн суусу аркылуу өтүүчү көпүрө иштетүүгө берилген. Бирок, кыска мөөнөттүн ичинде жаңы курулган көпүрө жараксыз абалга келген. Курулуш сапаттуу жүргүзүлгөн эмес, пайдубалынын бекемдиги эске алынган эмес, курулмада жаракалар пайда боло баштаган, көпүрөнү бара-бара дат басууда.

Текшерүүдө, жалгыз бир фирма катышкан тендер 2012-жылдын май айында жүргүзүлгөндүгү аныкталды. Тендердик комиссиянын мүчөлөрү башка адамдар менен сүйлөшүп, «Мамлекеттик сатып алуулар жөнүндө» КР мыйзамын бузуу менен «Элит Аймак Курулуш» ЖЧКсын тендердин жеңүүчүсү деп табышкан, бирок, бул жеке фирманын куруу иштерин жүргүзүүгө лицензиясы болбогондугу анык болду.

Расмий документтерге чындыгында аткарылбаган ишти аткаруу боюнча жалган маалыматтар киргизилип, мамлекетке 449 миң сом өлчөмүндө зыян келтирилген.

Мамлекеттик стандарттын ченемдерине ылайык келбегенине жана көпүрө курууда келтирилген кемчиликтерге карабастан, КРнын транспорт жана коммуникациялар министрлигинин алдындагы Ош-Бишкек унаа жолу мамдирекциясынын №26 жол тейлөө ишканасынын кызмат адамдары кабыл алуу актысын түзүшүп, көпүрөнү ишке киргизген. Курууда кеңеш берүүчү жана долбоордук кызматтарды «Кыргыз ТРЕК Интернэшнл» компаниясынын кызматкерлери көрсөткөн.

Иштин көңүл коштук менен аткарылышы, тендерди өткөрүү тартибинин бузулушу, кызматтык жасалмалуулук, кызматты кыянаттык менен пайдалануу көпүрөнү куруунун сапатына таасир берген.

Бул факт боюнча Ош облусунун прокуратурасы тарабынан КР Кылмыш-жаза кодексинин 304-беренесинин 2-бөлүгүндө (кызматтык абалын кыянаттык менен пайдалануу), 189 (тооруктарды, аукциондорду же тендерлерди өткөрүү тартиби жөнүндө олуттуу мыйзам бузуу) жана 315-беренесинин 2-бөлүгүндө (кызматтык жасалмалуулук) каралган кылмыш белгилер боюнча кылмыш иши козголду.

Ошондой эле, «Элит Аймак Курулуш» ЖЧКнын жетекчисине жана «Кыргыз ТРЕК Интернэшнл» компаниясынын инспекторуна карата «кылмышка катыштыгы бар» беренеси боюнча кылмыш иши козголду.

Тергөө иштери жүрүп жатат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×