Бөлүмдөр
Шейшемби, 18-февраль
Баткен облусуЛейлек району 13.02.2020 11:12 На русском

«Мени менен жекеме-жеке чыгасың»: 2 депутат мушташып, бирөөсү ооруканага кайрылды

Иллюстрациялык сүрөт
Иллюстрациялык сүрөт

Turmush -  Кечээ, 12-февралда Лейлек районунун Катраң айылдык кеңешинин 2 депутаты мушташты. Бул тууралуу өздүк булактар билдиришти.

Бул маалыматты Лейлек РИИБден тастыктап, окуя саат 19:00 чамасында болгондугун билдирди. Жергиликтүү кеңештин депутаты Н.Д. өз арызында (1973-жылы туулган) депутаттардын төрагасы С.Б. (1977-жылы туулган) аны эч себепсиз уят сөздөр менен тилдеп, сабап, жаракат келтиргендигин билдирген.

Маалым болгондой, кечээ жергиликтүү кеңештин сессиясы өтүп, анда депутат Н.Д. айылдык кеңештин төрагасы С.Б.нын иш-аракеттерин сындаган. Жыйын аяктап калган учурда Катраң айылында жайгашкан ооруканада өрт чыкты деп кабар келген. Сессиядагы айрым адамдар жакка барып, өрттү өчүрүүгө, имараттан буюмдарды алып чыгууга жардам беришкен. Өрт өчкөндөн кийин Н.Д. тааныштарынын унаасы менен айылдын Ташбалтаев көчөсүнө кайтып келген. Ал тааныштары менен унаанын ичинде отурган кезде төрага С.Б. келип калган. Ал унаанын арткы отургучуна отуруп, алдыңкы орунда отурган Н.Д.га «мафиялар олтурасыңарбы?» деген. Андан кийин «Сен бузукусуң. Мени менен жекеме-жеке чыгасың» деп артынан муунткан. Уят сөздөр менен сөгүп, жерге жыгып, көкүрөккө, бетке бир нече жолу урган. Ошол учурда аларды башкалар ажыратышкан. Андан кийин жабырлануучу депутат Н.Д. Лейлек райондук ооруканасына жаткырылган. Анын мээси чайкалып, моюну, колдору көгөргөн деген диагноз коюлган. Аталган факты боюнча соттук-медициналык экспертиза дайындалып, Жазык кодексинин 266-беренеси (ээнбаштык) менен сотко чейинки өндүрүш иши башталды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×