Бөлүмдөр
Шейшемби, 18-февраль
Талас облусуКара-Буура району 12.02.2020 09:17

27 жаштагы директор кыз ыйлап, класска бекинип. Окуянын чоо-жайы (сүрөт)

Turmush -  Кара-Буура районунун Бейшеке айылынын 75 жаштагы тургуну Канышайым Асылбекова 53 жылдан бери мугалим болуп иштеп келе жатат. Аймактык кабарчы аны менен таанышты.

Өзүнүн айтымында, Таластын Бакыян айылында төрөлгөн.

«1967-жылы В.Маяковский атындагы кыз-келиндер институтунун орус тили жана адабияты факультетин бүткөм. Ардактуу кесипти мага да буйруптур. Согуштан кийинки мезгилде төрөлгөндөр маңыроо болуптурбуз. Окуп, билим алыш деген биринчи орунда болгон эмес. Өзгөчө кыздар окучу эмес. Бакыяндан 10-классты биринчилерден болуп бүткөнмүн. 1967-жылы Бейшеке айылындагы мектепте мугалим болуп келдим. Кийин уюштуруучу болдум. Андан кийин 1973-жылы директор болдум. Мени 27 жашымда ыйлатып туруп директор кылып коюшкан. Анда биз кызматты түшүнчү эмеспиз. Мен класска качып, бекинген күндөрүм болгон. Ошол кезде 2-3 жыл дегенде суу маселеси чечилип, Бейшеке айыл өкмөтүнө караган коңшу Кара-Суу айылындагы мектепти мен салдырып, ал мектепке барып 10 жыл иштедим. Калган 30 жылдан бери баштапкы Бейшеке орто мектебинде кесибимди улап келе жатам.

Ошол мезгилдерде дээрлик бардык адамдардын мүнөзү, ойлору таза болчу. Байлык, мансап деп жулунайын деген болгон эмес. Эми чарчаганымды туйбай, жаш мугалимдерге кеңешчи болуп ишимди улап келем. Педагогдор күнүнгө ар кандай жагдайларга туш келебиз. Өмүрүңдү балдарга арнап койгондон кийин тарткан түйшүгү билинбей калат. Окуучуларды өзүңдүн балдарыңдан дагы артык көрүп каласың. Бул жумушумду балдарга болгон сүйүүм менен тандап алгам. Балдарды көрбөсөң тынч тура албайсың.

30 жылдан ашык жетекчи болуп жааматты дагы, окуучуларды дагы калкалап, эч кактырган жокмун. Кандай жагдай болсо дагы жакшы жол менен чечип алууга болот. Мугалимдик кесипти бийик тутуп окуучуларга мугалим бардык адамзаттын тарбиячысы, устаты экенин айтып, мугалим болуп эмгектенгениме сыймыктанам. Эмгегимдин сыймыгын дагы сыйлыгын дагы көрүп, көптөгөн грамоталарды алып, 1994-жылы «Эл агартуу отличнигин», 2003-жылы «Эмгек сиңирген мугалим» сыйлыгын, 2010-жылы президенттин ардактуу грамотасын алдым. Жакшы адамдардын колдоосу менен персоналдык пенсияга чыккам.

Мугалим — мен үчүн жан дүйнөсү таптаза бийик адам. Союз тараганда баарына чыдап, айлык албай иштеген күндөрүм болгон. Мектептердин шарты начар, элдин дагы жашоосу кыйын болчу. Эл менен байланышып, ошого карабай мектепти оңдоп-түздөп жаркыратып алып отурдук. Кыйын заманда иштеп, ошондо дагы мектепти таштаган жокмун. Ал кезде көрсөтмө куралдарды күндөп-түндөп жасап сабакка даярданчубуз. Үйдөн капа болсок дагы мектепте күлүп турган мугалим. Ооруп калсак дагы окуучулардын маңдайында күлүп турабыз. Кыйын күндөрдө чыдабай кетип калган мугалимдер болгон. Айлык көтөрүлгөндө келишкен», - деди ал.

Мугалим апа 4 баланы чоңойткон.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×