Бөлүмдөр
Шейшемби, 18-февраль
Ысык-Көл облусуБалыкчы 11.02.2020 10:22 На русском

«Тиги кишиге анда-санда жүгүнүп кой»: Кудадан келгенден кийин кайнатасын тааныбай калган Амина жеңе

Turmush -  Балыкчы шаарынын 25 жаштагы тургуну Амина Асакеева 2017-жылы турмушка чыккан. Бишкек шаарындагы Насирдин Исанов атындагы Кыргыз мамлекеттик курулуш, транспорт жана архитектура университетинин 2-курсунун студенти. Бухгалтер кесиби боюнча окуйт. Амина Асакеева аймактык кабарчы менен болгон маегинде жаңы келин болгон кезиндеги кызыктуу окуясы менен бөлүштү.

«22 жашымда турмушка чыккам. Жолдошум менен мектепте окуп жүргөндө эле тааныш болчубуз. 2 ай сүйлөшкөндөн кийин үйлөнөлү деп бат эле колумду сураган. 2017-жылы үйлөнгөнбүз.

Жолдошум Асакеев Азамат 1985-жылы туулган, бухгалтердик кесип боюнча билим алган. Азыр убактылуу үйдө. Мен кыялдангандай күйөө, сүйүктүү жар.

Келин болуп баргандан кийин эле көшөгөдөн чыгып, оокат кыла баштагам. Ошол кезде кайын атама жүгүндүрөлү деп чакыртышты. Тике карай албай койгом. Кайын атам костюм кийген жакшынакай киши көрүнгөн. Бир-эки сааттан кийин кайын атам кудага кийип барган кийимин чечип салыптыр да, жаман топу, анан спорттук кийим кийип алыптыр. Кайын атам экенин тааныбай калыптырмын. Анткени бетин жакшы карай албай койгом. Анан кайын эжеме "тиги топучан кишиге да жүгүнөмбү? Бул ким?" деп сурасам, "кайын атаң" деген. Азыркыга чейин "тиги кишиге анда-санда жүгүнүп кой" деп күлүп калышат.

Жолдошум менден улуу болгон үчүн "байке" дечүмүн. Үйлөнгөндөн кийин эмне деп чакырарымды билбей кыйналгам.

Бош убактымда айымдардын тырмактарын жасап берем. Учурда бала менен үйдөмүн. Жеке ишкерлик менен алектенген жагат. Бирөөнүн кол алдында иштеген жакпайт. Жолдошум экөөбүздүн көптөгөн пландарыбыз бар, буюрса ишке ашат деп ишенебиз», - деди Амина Асакеева.

Жаш жубайлардын учурда бир кызы бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×