Бөлүмдөр
Ишемби, 25-январь
Баракелде, Бишкек 24.12.2019 13:47

Россияга барган К.Токталиев аэропорттон чыгып эле 30 өзбек менен «паровоз» болуп басканын унутпайт

Кабылбек Токталиев
Кабылбек Токталиев

Turmush -  6 жылдан бери Россияда иштеп жаткан Кабылбек Токталиев мекендештер менен чогуу өзүнүн кичи мекенине жардам берүү үчүн Кичи-Кемин фондун түзгөн. Мында мигранттар ай сайын акча чогултуп, аз камсыз үй-бүлөлөргө жардам берип келишет.

Кабылбек Токталиев 1988-жылы Чүй облусунун Кемин районуна караштуу Кичи-Кемин айылында төрөлгөн.

«Болот Юнусалиев атындагы Кичи-Кемин орто мектебин аяктап, Исхак Раззаков атындагы Кыргыз мамлекеттик техникалык университетинен энергетика боюнча билим алып чыккам. Ал эми чет жакта жүргөнүбүзгө алты жылдын жүзү болду. Учурда Москва шаарындагы гимнастикалык матрас чыгаруучу чакан ишканада иштейм. Жумуш көп болгондуктан бош убакыт аз. Жекшемби күнү мечитке намазга барабыз. Ошондой эле фитнес клубга барып, чуркап, сууга түшөм», - деди ал.

Кабылбек Токталиев Москвага жаӊы барганда полиция кызматкеринин колуна түшүп калган окуясын унутпайт.

«Эсимде, Москвага жаңы келген күнү эле отуздай өзбек туугандар менен чогуу полиция кызматкерлеринин колуна түшүп калгам. Катарга тизилип, колдорубузду алдыда турган адамдын ийинине коюп, чоң жол менен бөлүмгө чейин барганбыз. Анысы аз келгенсип телеканалдардын кабарчылары да келген. Көчөдөн ары-бери өткөндөрдүн айрымдары күлүп, кээ бирөө бизге болушуп жатты. Уялганымды айтпаңыз. Жердин катуусунан гана чыдап бардым. ЕАЭБге киргенге чейин бул жакта мигранттар үчүн жашоо, иштөө кыйын эле болчу. Азыр кудайга шүгүр, кыргызстандыктар үчүн бир топ жеңилдиктер бар», - деди ал.

Мекендешибиз бала кезинде кыялданган кыялына чет өлкөдө жүргөндө жетти.

«Жашоодогу негизги максатым — жаратуучум Аллахты таанып билүү, ибадат кылуу. "Адамга эң кыйыны — күн сайын адам болуу” деп залкар жазуучу Чыңгыз Айтматов айткандай, жашоодо кандай гана сыноо болсо да адамдык касиетибизди жоготпой, адам бойдон калуу маанилүү. Келечекте балдарыбызга туура тарбия берип, элине кызмат кылган ыймандуу уул-кыздарды чоңойтсок деген ниеттерибиз бар.

Кичи-Кемин кайрымдуулук фондун түзүү идеясы мага тиешелүү. Тээ бала кездеги кыялдардын бири болчу. Балдар үйүнө, карылар үйүнө жардам берсем дечүмүн. Алыста жүргөндө мекениӊди, эли-жериңди сагынып, жүрөгүңдө патриоттук сезимдер да ойгонот экен.

Каттоодон өтпөгөн фонд. Фонддун негизги максаты — айылыбыздагы аз камсыз болгон, көп балалуу үй-бүлөлөргө жана майып адамдарга материалдык жана акчалай жардам көрсөтүп туруу. Кайрымдуулук иштер ар ай сайын уюштурулуп турат», - деди ал.

Мекендешибиз үй-бүлөлүү, бир уулдун атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×