Бөлүмдөр
Дүйшөмбү, 9-декабрь
Нарын облусу, Нарын 03.12.2019 11:47 На русском

Нарында абактан качкан киши мыкаачылык менен өлтүрүлүп, сөөгү Ак-Талаадагы суудан чыккан. Окуянын чоо-жайы

Иллюстрациялык сүрөт
Иллюстрациялык сүрөт

Turmush -  Кыргыз милициясынын 95 жылдык мааракесине карата Turmush басылмасы бул тармакка өмүрүн арнаган кызматкерлерди тааныштырууну улантат. Бул жолку каарманыбыз — Нарын ОИИБдин башчысынын орун басары, милициянын полковниги Мадланбек Турпанбаев Турарович.

Ал 1971-жылдын 27-февралында Нарын шаарында төрөлгөн.

Атам дарыгер бол деген

- Бала кезимде башка балдардай эле учкуч жана милиция кызматкери болууну кыялдангам. Атам «агаң дагы милиция кызматкери болуп кетти. Сен эми дарыгер бол деп айтты. Себеби чоң атам милицияда старшина болуп иштеп, пенсияга чыккан. Атам дагы милиция кызматкери болуп иштеп, 1988-жылы милициянын полковниги наамын алган. Мен «макул» деп көңүлүн калтырбай жүрө бердим. Мектепти бүткөндөн кийин аскерге кетип калдым. Кызмат өтөп жүргөндө бөлүмдүн командири болдум. Ата-эненин, мекенибиздин кадырын алыста аскерде жүрүп билдим. 1991-жылы аскерден келгенден кийин атам Ош облусунда иштеп жатыптыр. Анын жанына барып эле милициянын кайгуул-күзөт кызматында иштеп баштадым. Тактап айтканда Өзгөн, Ноокат райондорунда иштедик. 1992-жылы милициянын жогорку мектебине барып, аны 1996-жылы бүтүрдүм. Окууну аяктагандан кийин Нарынга кызмат кылууга буйрук чыкты. 1996-жылы Нарын РИИБде тергөөчү болуп иштеп баштадым. 1997-жылы ушул РИИБдин кылмыш иликтөө бөлүмүндө, 1998-жылы Нарын ОИИБдин кылмыш иликтөө бөлүмүндө, 2004-жылы Ат-Башы РИИБдин жетекчисинин орун басары болуп иштедим. 2006-жылы Нарын ОИИБдин кадрлар бөлүмүнүн башчысы, 2011-жылдын башында Ат-Башы РИИБдин башчысы, 2011-жылдын аягында Нарын ШИИБдин башчысы болдум. 2015-жылдан бери Нарын ОИИБдин башчысынын орун басары кызматын аткарып келе жатам.

10 жылдан кийин билинген окуя

- 2002-жылы Нарын шаарындагы РТС аймагында адам өлтүрүү фактысы катталды. Ошол кылмыштын бетин ачабыз деп жатып 1993-жылдагы адам өлтүрүү кылмышынын бетин ачканбыз. Ошол 1993-жылы абактан качты делген киши Нарын шаарында иштеп жүрүптүр. Бир күнү кошунасы менен жер үйдө арак ичип отуруп, аны менен урушуп кеткен экен. Ошондо аталган кишини кошунасы бычак сайып өлтүрүп, төшөккө ороп, Нарын суусуна алып барыптыр. Андан кийин күйүүчү май чачып өрттөп, шаркырап аккан сууга салып жиберген экен. Маркумдун сөөгү суу менен агып, Ак-Талаадан чыгып калыптыр. Өз убагында бул кылмыштын бети ачылган эмес. Биз РТС аймагында катталган кылмышка шектүү дегендерди суракка алып жатып, ушул 1993-жылдагы болгон окуяны билип калдык. Архивдик материалдарды карасак, аталган киши кылмыш жообуна тартылып, бирок абактан качып, издөөдө жүргөн экен. Анан жанагындай болуп өлтүрүлүптүр. Мындан дагы кызыгы, 2002-жылы РТС аймагында катталган кылмыш боюнча бизге суракка 5-6 айдан бери келип жүргөн адам өлтүргөн экен. Ал маркум менен күнүмдүк тиричилик боюнча гана урушуп кетиптир. Бул кишини бир көргөн адам жаман ишке барат деп айтпайт. Бизде суралып жүрүп, акыры күнөөсүн мойнуна алган.

Абактан качкан киши

- Издөө багытында иштеп жүргөн кезим. 1993-1994-жылдары өтө оор кылмыштарга шектелип кармалган киши Казарман айылындагы убактылуу кармоочу жайга киргизилген экен. Ал ошол жерден 4-5 шектүү менен чогуу качып кетиптир. Аны 10 жылдан кийин, тактап айтканда 2003-жылы Нарын районундагы тоодон кайра колго түшүрдүк. Жанындагы адамдар тез эле кармалып, ушул киши эле 10 жылдан бери кармалбай жүрүптүр.

1997-жылы жол кырсыгын жасаган адамды 3-4 жылдай издедик. Бир күнү курсташтарым Жалал-Абадга конокко чыкырып калышты. Биз издеп жүргөн адамды ошол жерден таап алдык. Муну аябай жеңил эле колго түшүргөнбүз. Кээде ушундай кылмыштын бетин ачуу үчүн башыңды жерге сайып иштесең дагы ачылбайт, айрым учурда иштин бети жеңил ачылып калат.

Ал түрктөр менен иштеп, жазадан качып, ар кайсы жерде жүргөнүн айтып берди. Ошондой эле шектүү кылган ишине өкүнүп, ушунча жыл качып жүрбөй мурда эле кармалсам болмок экен деген.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×