Бөлүмдөр
Жума, 6-декабрь
Талас облусуТалас району 03.12.2019 11:40

Эл ичи — өнөр кенчи: Марс мырза үй-бүлөсүнүн колдоосу менен көк бөрүгө аралашып, ийгиликтерди жаратууда (сүрөт)

Turmush -  Талас районунун Арал айылынын 29 жаштагы тургуну Марс Бакберди уулу үй-бүлөсүнүн колдоосу менен көк бөрү боюнча мелдештерге катышып, ийгиликтерди жаратып жүрөт. Аймактагы кабарчы аны менен таанышты.

Өзүнүн айтымында, көк бөрүгө аралашып келе жатканына быйыл 13 жылдын жүзү болду.

«Агам айыл ичиндеги улактарга мени көп ээрчитип барчу. Ал ойнойт, мен элге кошулуп улак көрүп отурам. Бул оюн мага өзгөчө таасир калтырып, мен дагы ойногонго даярданып жүрдүм. Биринчи жолу 15 жашымда өзүбүздүн Арал айылында өткөн көк бөрүгө катыштым. Ошол жерден менден улуу агалар атка жеңил отурганымды, көк бөрүнүн тактикасын жакшы өздөштүрүп калганымды байкап, Арал айылынын көк бөрү боюнча командасына кошушкан. Бул мен үчүн жакшы жетишкендик болчу. Андан кийин район ичиндеги мелдештерде ойноп жүрдүм.

Өзүм жылкы баласына жакынмын. Көңүлүмө жаккан таза кандуу жылкы алсам деп ойлочумун. Ата-энем, бир туугандарым колдоп келишет. Атам ошол учурда мага атайын көк бөрүгө деп Бишкек шаарынан 150 миң сомго таза кандуу жылкы алдыртып берди. Чындыгында бул күлүк менен жакшы оюндарды көрсөтүп, көптөгөн ийгиликтерге жетиштим десем болот. Район ичиндеги жакшы жетишкендиктеримден улам Талас облусунан жаштар арасынан түзүлгөн «Алкан ата» командасына тандалып, республикалык деңгээлдеги оюндарга катышып жатам. Негизи улакчы жакшы оюн көрсөтүшү үчүн анын алдындагы аты дагы күчтүү, акылдуу болушу керек. Мен «Алкан ата» командасына жаңы кошулган кезде агам белек кылып, Көкжар деген таза кандуу жылкы алып берген. Азыркы учурда Көкжар менен оюндарга катышып жүрөм. Атым келе жаткан жазда 3 асый болот. Оюн учурунда казанды жакшы коргойт.

Көпчүлүк «аттар менен аралашып ойнойсуңар, сырттан карап турган адамга коркунучтуудай сезилет» деп айтып калышат. Сырттан караганда оор көрүнүшү мүмкүн. Бирок бул азарт оюн. Бир жолу кызыгууң болсо эч таштай албайсың. Экинчиден оюн эмоция менен өткөндүктөн мелдеш учурунда алган жеңил жаракаттарыңды билбей деле каласың», - деди ал.

Көк бөрүчү жигит үй-бүлөдө 4 бир тууган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×