Бөлүмдөр
Жума, 6-декабрь
Ош облусуКара-Кулжа району 03.12.2019 10:01 На русском

Жаш талант: Капысынан «Сары кызды» ырдап, интернет жылдызына айланган 5 жаштагы Жумали. Видео

Turmush -  5 жаштагы Жумали Досбаев 1 жыл мурун «Сары кыз» аттуу чыгарманы аткарып, интернет жылдызына айланган. Жумалинин атасы Жоомарт Көбөнов учурда уулунсоциалдык тармактардын колдонуучулары колдоого алып жатышканын билдирди. Жаш таланттын атасы менен аймактык кабарчы маектешкен.

Жоомарт Көбөнов үй-бүлөсү менен Кара-Кулжа районунун Сары-Күнгөй айылында жашайт. Үй-бүлө мал чарба менен алектенет. Ал уулу «Сары кыз» чыгармасын капыстан ырдап калганын айтты.

«Жумали "Сары кыз" деген ырды 4 жашында ырдап, интернет аркылуу таанылган. Жумалинин бир тууган Абдубали деген агасы бар. Абдубалини ырдаталы деп жатканда Жумали "мен ырдайм" деп калды. Ошондо Жумалинин жакшы ырдай турганын байкадым. Аны чөнтөк телефонго видеого тартып алышыптыр. Кийин эле интернетке тарап, адамдар колдоого алышты», - деди Ж.Көбөнов.

Анын айтымында, Жумалинин чоң атасы Досбай Көбөнов да ырдачу.

«Балдарымдын баары эле ырдайт. 10 жаштагы уулум Абдубали дагы жакшы ырдайт. Ал 8 жашында Кара-Кулжа районунда өткөн кароо-сынакта 2-орунду алган. Эң улуу балам Ош шаарындагы окуу жайдан музыкалык билим алып, аскердик кызматын өтөп келди. Өзүм дагы мурда ырдачумун. Атам Досбай ажылыкка барып келгенден кийин ырдабай калды. Ал учурда 91 жашта», - дейт Ж.Көбөнов.

Жаш талант Жумали 2 жылдан кийин мектеп босогосун аттайт. Ата-энеси уулун музыкалык мектепке берүүнү көздөп жатышат.

«Жумали башка балдарыма салыштырмалуу жакшы ырдайт. Үнү дагы өзгөчө. Өзүнөн сурасак ырчы болом деп айтат. Ырчы болом десе каршы эмеспиз», - деди Ж.Көбөнов.

Жумалинин интернеттеги видеосун 100 миңден ашык адам көргөн. Ал «Сары кыз» ырынан тышкары «Жылуулук», «Чаткалдын тоосун ашканда» деген чыгармаларды аткарып таанылган. Атасы кийин Жумалини издеп, телефон чалгандар көбөйгөнүн кошумчалады.

«Учурда Жумалини сурап тез-тез чалып турушат. Айылда ырдап берчи дегендер көп. Аккордеондо ойноп берсе ырдайт. Улуу агасы аккордеондо ойнойт. Агасы келген учурда дайыма чогуу ырдап калышат. Тартынбайт. Тамга тааныбагандыктан ырларды угуп жаттайт. Өзүнө жаккан ырларды тез эле үйрөнүп алат», - дейт жаш таланттын атасы.

Жоомарт Көбөнов учурда 47 жашта. Жубайы Жемишгүл Термичикова менен 7 уул, 1 кызды тарбиялашат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×