Бөлүмдөр
Ишемби, 7-декабрь
Чүй облусуСокулук району 01.12.2019 23:35

Мугалим А.Өмүркулова бала кезиндеги кыялы орундалганына сүйүнөт

Turmush -  Чүй облусунун Сокулук районуна караштуу Саз айылындагы орто мектептин директору Айгүл Өмүркулова көп жылдан бери билим берүү тармагында иштеп келе жатат. Аны менен аймактык кабарчы таанышты.

Ал 1968-жылы 24-февралда Талас облусунда төрөлгөн.

«Балачагым Таласта өттү. Сокулук районуна караштуу Саз айылындагы мектепти 1985-жылы аяктадым. Ушул эле жылы Бишкектеги В.В.Маяковский атындагы Кыз-келиндер педагогикалык институтунун математика жана физика факультетине тапшырып, аны 1990-жылы аяктадым. Эмгек жолумду ошол өзүм окуп кеткен Саз айылындагы орто мектептен баштадым. Кийин Биринчи май айылына келип иштедим. Биринчи май орто мектебинде эмгектенгениме 29 жыл болду. Эмгек жолумда окуу бөлүм башчысы, директор, директордун тарбия иштери боюнча орун басары болуп иштедим. 2016-жылдан бери директорлук кызматты аткарып келем. Бул кесип менин бактым! Кичинемден баштап эле шкафтын бетин такта кылып, бир туугандарымды отургузуп алып аларга мугалим боло берчүмүн. Кыскасы мугалим болууну кыялданчумун. Мугалим болбосом, анда кайсы кесипти тандамак элем деп ойлоп коем. Кудайга шүгүр, мугалимдик кесип менен келечек муунга мыкты билим-тарбия берип, өзүмдүн да балдарымды багып, жакшынакай турмуш өткөрүп келем», - деди ал.

Ал башынан өткөн окуясын айтып берди.

«Биринчи май айылындагы мектепке жаӊы келген кезимде турмуш кура элек элем. Ошондо директор мени унаасы менен үйгө чейин жеткирип койчу. Анысы ала качып кетпесин дегени го. Ошентип жүрүп өзүмдүн жолдошумду жолуктуруп, турмушка чыктым. Тилекке каршы жолдошум кайтыш болуп калган. Эки балабыз бар. Уулум Изатты үйлөнтүп, кызым Бегимайды турмушка бердим. Экөө теӊ жогорку билимдүү.

Азыркы учурда мектебим замандан артта калбай алдыңкы мектептерден болушуна аракет кылып жатам. Мурунку окуучулар ыймандуу, адептүү болчу. Чынында азыр информациянын жана техниканын заманы окуучуларга да таасирин тийгизип жатат. Алар көп нерсени жеӊил чечип калышты. Мугалимдер да алардын жаӊы көз карашына жараша мамиле кылып, туура тарбия бергенге аракет кылышыбыз керек», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×