Бөлүмдөр
Жума, 6-декабрь
Талас облусу, Талас 12.11.2019 08:26 Жаңыланды: 12.11.2019 19:20

«Анда сиз түрмөгө түшөсүз»: Англис тилчи мугалимдин суроосу, окуучунун жообу (сүрөт)

Turmush -  Талас шаарынын 30 жаштагы тургуну Уулкелсин Бейшекеева балдарга билим берип, агартуу тармагында иштеп жатат. Аймактык кабарчы мугалим айым менен таанышты.

Анын айтымында, Бакай-Ата районунун Өзгөрүш айылында төрөлгөн. Учурда Талас шаарындагы №7 орто мектепте англис тилчи мугалим болуп иштеп жатат.

«Атам дене тарбия сабагынан мугалим болуп иштейт. Мен кичинекейимден эле атам окуучулары менен барган мелдештеринен калбай артынан ээрчип алчумун. Атамды көрүп окуучуларга жазуу жаздырып, китеп окутуп мугалим болсом дечүмүн. Кыялым орундалды. Волейбол ойноп, мектептен, кийин университеттен ийгиликтерге жетишип жүрдүм. Азыркы кезде мугалимдер менен ойноп жүрөм.

2011-жылы Талас мамлекеттик университетинен англис тилчи адистигине ээ болуп, алгачкы жолу Бакай-Ата районундагы Чалдыбар мектеп-интернатында иштедим. Акыркы 3 жылдан бери Талас шаарындагы №7 орус тилдүү мектепте англис тил сабагынан мугалим жана окуу тарбия иштери боюнча директордун орун басары болуп эмгектенип келем. Насаатчы мугалимдердин жардамы жана өзүмдүн аракетим менен ийгиликтерди жаратып келем. Кошумча сабактарды өтүү менен материалды өздөштүрүп, сынактарга катышып, байгелүү орундарды алып жүрдүк. Улуттук тил менен бирге глобалдык тил болгон англис тилин балдар үйрөнүп алса деп далбастайм. Себеби көп тил билсе, дүйнө менен жакындан тааныш болуп, көптү билет.

Бир күнү кенже класстарга сабак өтүп жатып менен «I don’t know» (мен билбейм) деген сөз кантип которулат?» деп сурап калдым. Жакшы окуган окуучум туруп, «мен билбейм» деп жооп берип отуруп калса орточо окуган окуучум «көрдүңүзбү, ал сүйлөмүңүздү орто окуган мен эле эмес, эң жакшы окуган Эржан, жада калса эч ким билбейт» десе түшүнгөн окуучуларым күлүп эле жиберишти. Баягы окуучум кызарып отуруп калды. Көп өтпөй мага келип, «сабакты калтырбай, окуш керек экен» деп айткан. Эң жакшы окубаса дагы жакшы окууга аракет кылып, тартибин оңдогон. Дагы бир сабакта сүйлөмдөрдү чактарга алмаштырып жатканбыз. Бир окуучума кезек келип, «Мен адамга жамандык кылдым» деген сүйлөмдү келер чак кылып айтчы десем. Ал окуучум тапкычтыгы менен «анда сиз түрмөгө түшөсүз» деп классты күлкүгө салган.

Англис тилинде акылдуу деген сөздү колдонуп, сабагымдын башталышында «бул жерде ким акылдуу?» деп баштадым. «Колуңарды көтөргүлө» десем, бир окуучу баламдан башкасынын баары колдорун көтөрүштү. Баягы окуучумдан эмне үчүн колун көтөрбөгөнүн сурасам. Ал «эгер мен колумду көтөрсөм, анда сиз жалгыз болуп каласыз» деп коёт (күлүп). Бир окуучуман издөө деген сөздүн которулушун сурасам. Ал «to» менен сөздү уласам этиш болуп калат эмеспи деп ойлоп, «to goolge» деп боорумду эзген», - деди ал.

Мугалим айым 3 баланын апасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×