Бөлүмдөр
Бейшемби, 14-ноябрь
Ош облусуАлай району 06.11.2019 15:47

Алайда 4 айылдын эли таза суу жок кыйналууда (видео)

Turmush -  Алай районунун Корул айыл өкмөтүнө караштуу Кең-Жылга, Арал, Тогуз-Булак, 1-май айылдарында таза суу көйгөй жаратып келет. Жергиликтүүлөрдүн айтымында, алар 1-2 чакырым алыстан ат, эшек менен суу ташып ичишет.

«Корул айыл өкмөтүндөгү 4 айылдын тургундары таза сууга муктаж. Мен эс тарткандан бери Арал айылынын жашоочулары сууну 1-2 чакырым алыстан же арыктан, сайдан алышат. Унаа менен 2 челекке 60 литр суу алып келдим. Ал 1 күнгө жетпейт. Сууну үнөмдөп пайдаланабыз. Унаасы жоктор ат, эшек менен алыстан ташып келишет. Ага да мүмкүнчүлүгү жоктор арыктагы суудан алып ичкенге аргасыз болушат», - деди 60 жаштагы Тиленбай Райымкулов.

Кең-Жылга айылынан 30 үй-бүлө акча чогултуп, тоо боорундагы булактан желим түтүктөр менен суу тартып келишкен. Айылдын 79 жаштагы тургуну Эсен Эргешов бир учурда чыгарылган таза суу 1 жылга жетпей токтоп калганын айтат.

«Мындан 5 жыл мурда 30 үй-бүлө акча чогултуп, булактан суу тарттырып келгенбиз. Ага чейин биз да сайдан аккан суудан ичтик. Бирок ал суу дагы сел түшкөндө булганып калчу. Ошондо да тундуруп ичип келгенбиз. Малыбыз да, өзүбүз да ошол суудан ичкен күндөр болгон. Азыр деле башка айылдарда таза суу көйгөйү баштагыдай эле. "Жакында таза суу маселеси чечилет. Ар бир үйдүн короосунда таза суу болот" деп жатышат», - деди Эсен аксакал.

Корул айыл өкмөтүнүн башчысы Жыргалбек Аскарбек уулу 2020-жылы Корул айыл өкмөтүндөгү 4 айылдын баары таза суу менен 100% камсыз болорун айтты.

«Элибиз таза сууга чынында муктаж эле. Биз азыр бейөкмөт уюмдун таза суу боюнча долбоору менен 69 млн 300 миң сомдук тендер өткөрүп, 2019-жылдын август айынан баштап келишим түздүк. План боюнча иштер 2021-жылдын март айына карата бүтөт деп айтышкан. Бирок мөөнөтүнөн мурда күз айында бүткөрүп беребиз деп жатышат. Корул айыл өкмөтүндө 7,5 миң адам жашайт. Таза суу ар бир көчөгө, үйлөрдүн короосуна чейин киргизилет», - деди айыл өкмөт башчысы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×