Бөлүмдөр
Бейшемби, 14-ноябрь
Ысык-Көл облусуТүп району 04.11.2019 12:55

«Маркумдун тиши аркылуу кылмыштын бетин ачып…»: Подполковник Д.Абдыкадыровдун эл билбеген окуялары

Turmush -  Пенсияга чыккан милициянын подполковниги Давлет Абдыкадыров учурда Түп РИИБдин ардагерлер кеңешинин төрагасы, бокс боюнча Түп райондук федерациясынын вице-президенти болуп эмгектенет. Turmush басылмасынын аймактык кабарчысы кыргыз милициясынын 95 жылдыгына карата подполковниктин турмушундагы урунттуу окуяларды топтоду.

Абдыкадыров Давлет Мансурович 1957-жылы Түп районунун Түп айылында туулган. Улуту өзбек. 4 тилде эркин сүйлөйт. 1 кыз, 2 уулдун атасы, 4 небереси бар. Кызы турмуш куруп, Бишкекте жашап, иштейт. Алишер аттуу улуу баласы жеке ишкерчилик менен алектенет. Кенже уулу Фарух Абдыкадыров ата жолун жолдоп, Түп РИИБде айдоочу, милициянын сержанты. Юридикалык жогорку билимге ээ.

Давлет Абдыкадыров бокс, шотокан, самбо менен машыгат жана балык уулоо менен козу карын терүү анын хоббиси. Ал эмгек жолун 1975-жылы жыгач уста болуп иштөөдөн баштаган. 1975-1977-жылдары советтик армияда кызмат өтөгөн. 1979-1980-жылдары Ооганстанда аскер чалгынында кызмат кылып, 1980-1982-жылдары Фрунзедеги куруучулар техникумунда окуган. 1983-жылдан 2002-жылга чейин ИИМдин Ысык-Көл облустук ички иштер башкармалыгынын кызматкери болуп пенсияга чыкканга чейин иштеди.

Түп районунун Михайловка менен Маяк айылдарынын ортосунда көлдүн жээгинен адамдын сөөгү табылган. Анын оозундагы тиштеринен башкасы таанылбай калган. Бул жерге кылмыш иликтөө бөлүмүнүн ага ыкчам кызматкери Давлет Абдыкадыров баш болгон топ жетип барышкан болчу.

1979-1980-жылдары Ооганстанда Башкы чалгындоо башкармалыгында кызмат өтөп, Кабул, Кандагар жана Пакистанда өлүм менен өмүрдү башынан кечирип, уюшкан душмандарды талкалаганда «Эрдик үчүн», жарадар болгон командирин душмандардын колуна түшүрбөй аман сактап калганы үчүн «Кызыл жылдыз» орденине жана башка медалдарга ээ болгон Д.Абдыкадыров башка оперлерге караганда өлүк көргөндүк кылып, табылган өлүктү кылдат текшерип чыгат. Жыйынтыгында изди алтын тиштен издемей болгон.

Атайын уруксат алгандан кийин Ысык-Көлдү кыдырып жүрүп, адамдарга тиш салган дарыгерди Пржевальск (азыркы Каракол) шаарынан табат. Ал киши өзү салган тишти таанып, тиштерди Ташбаев аттуу адамга салганын айтып берет. Ташбаевдин үйүнө барса карындашы кийимдерин тааныган. Бул маркум жол кырсыгын жасап, киши өлтүрүп, качып кетип издөөдө жүргөн болуп чыгат. Давлет кайра эле Ташбаевдин карындашына кайрылган. Карындашы буга чейин агасы качпай эле жоголгонун айтса, аны эч ким укпай койгонун айтып буркурайт. Анан Давлет жол кырсыгынан каза болгон адамдын изине түшкөн. Анын иши менен таанышса өлгөндөн кийин иш козголуп, артынан кызыккан эч ким деле болбоптур. Бир жылдан кийин жол кырсыгынан өлгөн адамды иликтеп, ал Иллахун аттуу адамдын кылмыштуу тобунун мүчөсү болуп чыккан.

Талбай жүргүзүлгөн иштен кийин Иллахундун кылмыштуу тобу колго түшүрүлөт. Бул топ ага чейин ондон ашык тоноо жана киши өлтүрүү фактыларына шектелип, колго түшпөй жүргөн экен. «Житкен окту аткан ок табат» дегендей, Иллахундар Ташбаевдин өлүмүн да, жол кырсыгын да өздөрү уюштурушуп, жогорудай окуяны ойлоп табышкан. Аягында сот жообуна тартылып, күнөөсү мойнуна коюлгандан кийин Иллахун жана анын тобунун мүчөлөрү өздөрүнө тиешелүү жазасын алышкан.

Андан тышкары Д.Абдыкадыров бир мүшөк ун үчүн аялды өлтүрүп, көпүрөнүн астына көмүп кеткен кишини чалгынчылык сезимталдыгы менен бир суткага жеткирбей таап, күнөөсүн мойнуна алдырткан.

Ал мындан тышкары 1983-2002-жылдары Түп районунда паспорт столунун башчысы, Ысык-Көл ОИИБдин кылмыш иликтөө бөлүмүнүн башчысы болуп эмгектенип, подполковник чини менен эс алууга чыккан. Пенсияга чыкканда үйдө отуруп калган жок. «Балбай секьюрити» коопсуздук кызматында жүргөн 2009-жылдан бери Түп райондук социалдык өнүктүрүү башкармалыгынын үй-бүлө жана балдарды коргоо бөлүмүнүн башкы адиси болуп эмгектенип келе жатат. Анын кыргыз, орус, өзбек жана уйгур тилдерин билгени көп улуттун эли жашаган Түп районунда эмгектенүүсүнө жеңил жана ыңгайлуу болгон.

Өзү бокс боюнча спорттун чебери, шотокан стили жана самбонун кээ бир түрлөрү боюнча чебер болгондугуна байланыштуу райондо өспүрүмдөр арасында машыктыруучу жана Түп райондук бокс федерациясынын вице-президенти кылып шайлап алышкан. Ал жетектеген бокс федерациясында тарбияланган булгаары мээлейчендер ийгиликтерди багындырып келишет.

Д.Абдыкадыровдун уюштуруучулук жана башка касиеттерин түшүнө билген кесиптештери Түп РИИБдин ардагерлер кеңешинин төрагасы кылып шайлап алышкан. Ардагерлер кеңешинин курамында 67 ардагер, 24 жесир каттоодо турат. Ардагерлер кеңешинин туруктуулугун сактоо үчүн атайын фонд түзүшкөн.

Давлет Абдыкадыров аскердик жана милициядагы кызматтарындагы сыйлыктарынан кийин Түп райондук мамлекеттик администрациясынын «Кадырлуу эмгек каарманы» наамына татыган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×