Бөлүмдөр
Шейшемби, 12-ноябрь
Нарын облусуЖумгал району 21.10.2019 15:30

Жубайлар: Жетимиш ата менен Кантбү апага азыр да «жаш көрүнөсүздөр» дегендер көп (сүрөт)

Turmush -  Талас районунун Кара-Суу айылындагы 75 жаштагы Биримкулов Жетимиш ата менен 68 жаштагы Биримкулова Кантбү апа 50 жылдан бери бирге түтүн булатып келе жатышат. Аймактык кабарчы жубайлардан кабар алды.

Жетимиш ата: Колхоздун эгинин, чөбүн, апийим, тамеки, кызылчасын 58 жыл бою сугардым. 3 жыл колхоздун малын бактым. Барктаган эч ким жок. Анан калыстык каякта? Бала күнүм баарыбызга белгилүү болгон согуштун апаат мезгилине туш болгон. Машак терип, атала ичкен күндөрүм көп болду. 1957-жылга чейин баарына каниет кылып, жүгөрү нан жеп жүрдүк. Ошол замандын дагы тарбиясын көрдүм. 1967-жылы аскердик кызматымды Германиядан өтөп келдим. Жоокердик милдетти өтөө дагы жашоодо болгон жагдайларга туруштук бергенге үйрөтөт.

Байбичем экөөбүз 1969-жылы 19-январда баш коштук. Балдарыбызды чоңойтуп, кандай гана учур болбосун акылдашып бирге жеңип жашап келебиз. Жубайым адамгерчиликтүү, балдарга камкор, боорукер жан. Жашоонун ысык-суугуна чыдап, ушул күнгө жетип отурабыз.

Кантбү апа: Илгери жокчулук убакта чоң атам 2 куржун кант алып жатканын түш көрүптүр. Ошол кезде мен төрөлүп калып, мага Кантбү деген атты жашоосу таттуу болсун деп ырымдап койгон экен. Сиңдимдин аты Чайкүл болчу, ал кайтыш болуп кетти.

18 жашка толо электе абышкама турмушка чыктым. Себеби үйлөрүбүз жакын болуп, ортосун бир көчө бөлүп турчу. Сүйлөшпөй эле турмуш курдук. Ошол убакта ата-энелербизден алган тарбиябыз ыймандуулукка бурган. Эгер бүлө куруп калсак, ал үйдөгү отту өчүрбөй турмуш куруу керек дегенге үйрөнгөнбүз. Азыр шүгүр, баары жакшы. Өмүр бою кара жумушта, тамекиде иштеп жүрдүм. Абышкам балтырын сууга салып өмүрүн сугатка арнады. Бирге жашап келген бизге 50 жыл болуп, балдарыбыз алтын тойду белгилешти.

Көптөр «жаш көрүнөсүздөр» деп айтып калышат. Жакшы сөз угуу дагы жакшы. Мунун эч кандай сыры жок. Ата-эне катарында балдарга туура тарбия берип, карыганда алардын жакшылыгын көрүү бакыт экен. Бала-чакаң кейитпесе эле картайганга жол алыс. «Баатыр эне» сыйлыгын 4 жыл мурун алдым.

Жубайлар 6 кыз, 3 уул жана 30дан ашык неберенин ата-энеси. Экөө бош убакта багбанчылык да кылышат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×