Бөлүмдөр
Бейшемби, 14-ноябрь
Нарын облусуКочкор району 17.10.2019 17:37

«Мени кучактады да ...»: Чолпонбек Базарбаевдин досунан суранган акыркы өтүнүчү

Turmush -  Кочкор райондук маданият бөлүмүндө балет бийчиси Чолпонбек Базарбаев эскерилди. Бул тууралуу аймактык кабарчы билдирди.

Чопонбек Базарбаев Кочкор районунун Чолпон айылында 1949-жылы 4-февралда жарык дүйнөгө келген. М.Күрөңкеев атындагы мамлекеттик музыкалык-хореографиялык окуу жайды бүтүп, Москвадан да билим алган. КР жана СССРдин эл артисти жана Маданият министри болгонго чейин жетишкен.

Балет жылдызы кандай адам болгонун анын замандашы, досу Болот Асанбаев аймактык кабарчыга айтып берди.

«Чолпонбек Кочкор районунун Чолпон айылында төрөлгөн. Атасынын жумушуна байланыштуу 5-6 жаштарында Ат-Башы районуна көчүп кетишкен экен. Ошону менен ал балет мектебине окууга кетти. Ал бийчи эле эмес, куюлуштуруп сүйлөгөн, сөзгө да чебер болчу. Дайыма шайыр жүрчү. Үй-бүлөбүз менен катышчубуз. Азыр деле аялы Надя менен катышып турабыз. Бир жолу биздин үйгө келип, "мага туулуп өскөн үйүмдү көрсөтүп келчи" деп суранды. Чолпон айылына барып үйүн көрүп, абдан толкунданды. Бала кезинде эсте калган окуяларын айтып берген. Чет мамлекетке барган сайын мага арнап белегин көтөрүп келчү. "Еврейсиңби эмне, справочниктерди эле окуп отурасың. Андан көрө адабий китептерди окусаң" деп урушуп кетер эле. Өзү санжыраны, адабий көркөм чыгармаларды көп окучу.

2002-жылы август айларында мага Кочкорго үйгө келди. Ал-жайды сүйлөшүп отурдук. Коштошуп жатып, "досум өлсөк жылкы союшабыз" деди. Мен чоочуп кетип "эмне дегениң, капкайдагыны баштабай" десем, мени кучактады да артын карабай басып кетти. Ошондон бир айга жетип-жетпей, көлдөн келе жатып унаасы менен кырсыктап каза болду. Анын айтканын аткарып, кыркылыгында жылкы союп куран окуттум», - деди ал.

Чолпонбек Базарбаев 2002-жылы 53 жаш курагында жол кырсыгынан улам көз жумган.

Сүрөттөр Чолпонбек Базарбаевди эскерүү китептеринен алынды

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×