Бөлүмдөр
Бейшемби, 14-ноябрь
Ысык-Көл облусуТүп району 15.10.2019 16:53

«Уксус ичкен келинге 12 саат операция жасадык»: Хирург А.Бейшекееванын тажрыйбасы

Turmush -  Ысык-Көл облусунун Түп районунун 48 жаштагы тургуну Айнура Бейшекеева саламаттыкты сактоо тармагында 24 жылдан бери эмгектенет. Акыркы 4 жылдан бери Түп райондук ооруканасынын башкы дарыгери кызматын аркалап келген айым менен аймактык кабарчы таанышты.

Өзүнүн айтымында, ал Ак-Суу районунун Кереге-Таш айылында чоңойгон. Кичинекей кезинде эле дарыгер болууну кыялданчу. Мектепти аяктагандан кийин Кыргыз мамлекеттик медициналык академиясында билим алып, хирург-анестезиолог кесибине ээ болгон. Кийин Улуттук хирургия борборунда белгилүү хирург Мамбет Мамакеев менен 20 жыл иштешкен. Ал өзүнүн тажрыйбасында эӊ узак операция 12 саатка созулганын айтты.

«Улуттук хирургия борборунда иштеп жүргөндө (2013-жылы) Тоӊ районунан келген 30 жаштагы келинге операция жасадык. Ал жолдошу менен уруша кетип, уксус ичип алыптыр. Кызыл өӊгөчү күйүп калып, бизге кыйналып келди. Такыр тамак жей албай, өтө арыктап кеткен. Ошондо тобокелдик менен операция жасаганбыз. Ал 12 саатка чейин созулган эле. Тактап айтканда, уксус кислотасына күйгөн кызыл өӊгөчтү алып салып, жоон ичегиден кесип алып коштук. Биздин мындан башка айлабыз жок эле. Ошондо академик М.Мамакеев агайыбыз улам келип: "Бул бейтап наркоздон тирүү ойгонобу?" деп сурап кетет. Биз колубуздан келген аракетти жасадык. Ал бейтап эс-учуна келип, акырындык менен тамак ичип, жакшы болуп кеткен», - деди А.Бейшекеева.

Ал 2016-жылы Түп райондук оорукананын башкы дарыгери болуп дайындалып, Бишкек шаарынан үй-бүлөсү менен көчүп келген. Учурда ооруканага жаш кадрларды чакырып, тажрыйбасы менен дайыма бөлүшүп турат.

«Мен жаш хурург, анестезиологдорго дайыма кеӊешимди берип келем. Улуттук хирургия борборунда иштеп жүргөндө сокур ичеги болгон 19 жаштагы кызга операция жасап, чоӊ сыноодон өттүм. Бейтапка өз колум менен наркоз куюп, алгач андан "суу ичкен эмес белеӊ?" деп сурагам. Ал эч нерсе ичпегенин айткан эле. Бирок наркоздон кийин ашказанындагы суу өпкөгө толгон. Ошондо жаш кыздын өмүрү үчүн күрөшүп, 3 күн, 3 түн уктабай, бутуна тургузуу үчүн болгон аракетимди жумшагам. Андан бери 18 жыл өттү. Бирок ошол учур дагы деле көз алдымда. Азыр дайыма жаш кадрларга чоӊ сабак болгонун мисал кылып айтып берем», - деди башкы дарыгер.

Айнура Бейшекеева 1 кыз, 1 уулдун апасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×