Бөлүмдөр
Дүйшөмбү, 14-октябрь
Нарын облусуКочкор району 10.10.2019 08:00 На русском

Тарых инсаны: Эки бутунун манжаларын кестирген Ж.Абировдун согуштагы көз ирмемдери

Turmush -  Кочкор районунун Теңдик айылынын тургуну, Улуу Ата Мекендик согуштун катышуучусу Жумабек Абиров быйыл 95-күзүн тосуп отурат. Ал 18 жашында кан майданга аттанган. Ардагер менен аймактык кабарчы таанышты.

Жумабек атанын 2 бутунун тең манжалары кесилген деп эч ким ойлобойт. Ал өз алдынча эшикке кирип чыгып, коңшу-колоңдор менен сүйлөшүп отура алат. Акыл-эси тунук башынан өткөн күндөрдү эстеп айтып берет. 1923-жылы Кочкор районунда туулган.

«1941-жылы Улуу Ата Мекендик согушка 18 жашымда аттангам. Новосибирск облусунда 1 жыл курал кармоону үйрөнүп, даярдыктан өттүк. Пенза шаарындагы 313-аткычтар полкунда кызмат өтөп, 1943-жылы Сталинград кармашында оң бутума ок тийди. 1944-жылы согуш талаасында окопто жатканда эки бутумду үшүккө алдырып, манжаларымды кесип салышкан. Согуштун 2-топтогу майыбы болуп калдым. Азыр протез кийип жүрөм. Бир жылдай госпиталда дарыланып жатып, 1945-жылы август айында мекениме келүүгө туз буюруптур», - дейт Жумабек Абиров.

Согуш талаасында жүргөн күндөрдү эстеп үшкүрүп алды.

«Жаштыгыбызды, ден соолугубузду кан майданга тапшырып келдик. Канчалаган эр азаматтар көз көрүнө окко учуп, алардын балдары, аялы жана ата-энесинин көксөөсү суубай жетим-жесир болуп кала беришти. Дүйнөдө тынчтык гана болсунчу. Согуш талаасы тасмадан да коркунучтуу болчу. Башыңан чуулдап өткөн октор. Башы жарылып, колу-буту жулунган жоокерлер... Согуш талаасында жүргөндө денең эч нерсени сезбей, бет алдыга эле чуркап каласың. Атышуу токтогондон кийин биздин тараптан барып, окко учкан жоокерлерди жыйнап кетишет. Төшкө номур тагылчу. Ошол аркылуу аты-жөнүң, кайсы мамлекет, кайсы айыл экенин тактап кара кагаз жөнөтүлчү. Тамак-ашты да норма менен берчү. Уктап калбасын деп чалгынчы жоокердин курсагын көп тойгузчу эмес. Эстеп айта берсең өтө көп.

Ардагерлердин саны жыл өткөн сайын суюлуп бара жатат. Согуштун катышуучулары үчүн бериле турган үйгө экинчи кезекте турганыма көп жыл болду. Дагы деле бериле элек. Жеңишке ээ болгонубузга эмки жылы 75 жыл болот. Биздин баркыбызды билип берсе кубанабыз. Эгер 75 жылдыкта бербесе, анда мамлекет бизди баалабаганы деп түшүнөм», - деди ал.

Жумабек Абиров согуштан кайтып келгенден кийин Кочкор районундагы Кара-Тоо айылындагы механизаторлорду даярдоо курсун аяктап, көп жылдар бою жылкы баккан. Анын 3 баласы, 17 небере, 23 чөбөрө, 4 кыбырасы бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×