Бөлүмдөр
Дүйшөмбү, 21-октябрь
Жалал-Абад облусуТоктогул району 08.10.2019 13:27 На русском

Токтогулдун тургундары кен чалгындоо ишине каршы чыгышты. Сүрөт

Turmush -  Токтогул районунун Үч-Терек, Кызыл-Өзгөрүш айыл аймактарынан 500гө жакын адам геологиялык чалгындоо ишине нааразы болуп, элдик жыйынга чогулушту. Кен түбөлүк казылбашы керек деген талапты койгон тургундар менен аким баш болгон бийлик өкүлдөрү жолукту. Бул тууралуу аймактык кабарчы билдирди.

Маалым болгондой, райондогу геологиялык чалгындоо иштерин Кызыл-Өзгөрүш, Үч-Терек айыл аймактарындагы Такталык, Каргыш, Кокуй-Бел жана Кара-Кыр участкаларында «Кирекс Оф Минералс» компаниясы жүргүзгөн. Энергетика, өнөр жай жана жер казынасын пайдалануу мамлекеттик комитети жалпысынан ал үчүн 21 миң гектардан ашуун жер берген. Аймактарды чалгындоого айылдык кеңештин депутаттары да макулдук берип, токтом чыгарып беришкен. Бирок элдин нааразычылыгынан улам Үч-Терек айылдык кеңештин депутаттары 2017-2018-жылдары чалгындоого уруксат берген токтомдорун өздөрү быйыл артка кайтарып алышкан.

Үч-Терек айыл өкмөтүнүн жергиликтүү кеңештин депутаты Зыпарбек Кулманбетов: «Кезегинде элге маалымат жеткиликтүү берилбей калган, анан өзүбүздө толук кандуу маалымат болбостон чалгындоо ишин жүргүзүүгө уруксат берип койгонбуз. Элдин талабынан улам макулдук берилген токтомду жокко чыгардык. Биз эми айыл аймакта чалгындоо ишине байланышкан лицензияларды жокко чыгаруу маселесин коюп жатабыз. Биз жайыттарды жок кылып албайлы деп ушул макулдук берген токтомду кайтарып алдык. Учурда Ничке-Сай, Өзгөрүш айыл өкмөттөрүнүн жергиликтүү кеңештин депутаттары да биздин чечимди колдошуп, алар дагы кайтарып алуу жагын карап жатышат», - деди.

Үч-Терек айылында уюшулган жыйында тургундар колдоруна «Жер чиновниктердики эмес, жер элдики, кен түбөлүк казылбашы керек» деген жазуусу бар плакаттарды кармап турушту. Элдик жыйынга катышкандардын бири Дамира Чокоева район аймагындагы кендин казылышы экология зыянын тийгизерин айтууда.

«Үч-Терек өрөөнүнүн аймагында эч качан кен казылбасын деген талап менен жыйынга топтолдук. Эгерде кен казылса экологияга, сууга, абага, мал-жандыкка зыяны тиет. Райондо кен байлыктарга геологиялык иш жүргүзүүгө «Кирекс Оф Минералс» компаниясы уруксат алган экен. Биз бул компаниянын ишмердүүлүк жүргүзүүсүнө каршыбыз. Ансыз да Токтогул суу сактагыч үчүн мекендеген жерибизди бергенбиз», - деди Д.Чокоева.

Чогулгандар менен жолугушууга келген аким буга чейин сөз болгон «Кирекс Оф Минералс» жоопкерчилиги чектелген коомуна берилген лицензиялар токтотулганын кошумчалады.

«Буга чейин жер казынасын пайдалануу мамлекеттик комитетине лицензиядагы Токтогул районунун аймагындагы жерлерди кыскартып берүү боюнча каралган. Аталган комитеттин лицензия берүү комиссиясы аны карап чыгып, 25-сентябрда район аймагындагы жерлерди кыскартканы боюнча айтылды. Ошол себептүү аталган компания район аймагындагы жерлерде чалгындоо иштерин жүргүзбөйт, бул боюнча атайын элге түшүндүрүү иштерин жүргүзүп жатабыз. Ал эми азыркы тапта Токтогул районунун аймагында 3 кен казуучу компания лицензия алып иштеп жатат деген маалыматтар бар. Аны тактап, элге да маалымат беребиз», - деди аким Таалай Жайылов.

Жыйын учурунда чогулгандар акимге Токтогул районунун аймагындагы геологиялык чалгындоо иштери токтошу керек деген талаптарды коюшуп, мындан сырткары айылдардагы социалдык көйгөйлөрдү айтышты.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×