Бөлүмдөр
Дүйшөмбү, 21-октябрь
Нарын облусу, Нарын 06.10.2019 14:24 На русском

«Быйыл эле жумушка кирген»: Нарында топурак алдында калган Айдарбектин артында 3 баласы калды

Turmush -  Иш учурунда топурак алдында калып каза болгон 28 жаштагы жумушчунун өлүмү боюнча атайын комиссия түзүлдү. Бул тууралуу аймактык кабарчыга «Нарын суу канал» ишканасынын жетекчиси Нурлан Максүталиев билдирди.

Анын айтымында, Айдарбектин сөөгү кечээ, 5-октябрда өзүнүн кичи мекени Нарын районунун Таш-Башат айылына коюлду. Анын артында 3 баласы калды.

«Ал быйыл эле жумушка кирген, ширеткич болуп иштечү. Жарылган суу түтүгүн текшерүү үчүн казылган жерге кирген экен. Ошол маалда кырсыкка учураптыр. Мен эмгек өргүүдө элем. Жумушуна так, элпек, жакшы жигит болчу. Артында жубайы, 3 баласы калды. Апасынын каза болгонуна эки жылдай болуп калыптыр. Жакында эле анын эстелигин коюп келген. Ал эми атасы бала кезинде эле каза болуптур. Бүгүнкү күндө кырсык боюнча атайын комиссия түзүлүп, тийиштүү иштер жүргүзүп жатат», - деди Н.Максүталиев.

Айдарбек үй-бүлөдө жалгыз эркек болгон. Үч карындашынын экөөсү турмушка чыккан болсо, кичүүсү 9-класстын окуучусу. Өзү мындан 2 ай мурда үчүнчү перзенттүү болгон.

-------------------------------------------------

Нарын шаарында топурак алдында калган 29 жаштагы жумушчунун абалы туруктуу. Бул тууралуу аймактык кабарчыга Нарын облустук бириктирилген ооруканасынын сынык-жаракат бөлүмүнүн бөлүм башчысы Кубан Борсокеев билдирди.

Анын айтымында, аталган жигит кырсыктан катуу коркуп, стресс алган.

«3-октябрда «Нарын суу канал» ишканасынын сантехниги биздин бөлүмгө келип түшкөн. Бейтаптын абалы туруктуу. Сынык-жаракат алган эмес. Бирок денеси ооруп калган. Азыр «ийиним, белим ооруп жатат» деп айтууда. Денеси ылай болуп келгендиктен жуунтуп жаткырдык. Азыр улам-улам карап жатабыз. Невролог-дарыгерин дагы чакыртып көрсөттүк. Мындай кырсыктап келгендерди амбулатордук кароодон өткөрүп, үйүнө эле чыгарчубуз. Ал эми бул бейтаптын абалын эске алып, 2 күнгө чейин ден соолугун карамай болдук», - деди ал.

3-октябрда болжол менен саат 16:00 чамасында «Нарын суу канал» ишканасынын жумушчулары Нарын шаарынын Райымбеков көчөсүндөгү жер алдындагы суу түтүгүн оңдоп жатышкан. Ошол маалда эки жумушчуну таш аралашкан топурак басып калган. Алардын бири кесиптештери тарабынан чыгарылып, тез жардам унаасы менен ооруканага алып кетишкен.

Ал эми экинчисин чыгара албагандыктан куткаруучуларды чакырышкан. Алар топурактын алдынан жумушчунун жансыз денесин алып чыгышкан.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×