Бөлүмдөр
Дүйшөмбү, 21-октябрь
Талас облусу, Талас 30.09.2019 16:26

Чоң энемдин насааты: А.Оболбеков Таласта көмөк чордондорду оңдоп, кесиптештери менен элге кызмат кылып жатат (сүрөт)

Turmush -  Талас шаарынын 35 жаштагы тургуну Аман Оболбеков «Түндүк электр» ААКтын Таластагы филиалынын трансформаторлорду оңдоо цехинин жетекчиси болуп эмгектенип келет. Аймактык кабарчы электриктен кабар алды.

Өзүнүн айтымында, Талас районунун Көпүрө-Базар айылында төрөлгөн.

«Учурда иштеп жаткан ишим 3 уктасам түшүмө кирген эмес. Үйдө атам спорт жаатында иштеп, көп ийгиликтерди жараткан адам. Машыктыруучу, эл агартуунун отличниги болгон. Мектепти аяктаган учурда өзүмдү спорт жаатында көрчүмүн. Бирок чоң апам «балам, электрик жагын оку, ошол жакта көбүрөөк пайдаң тийип иштейсиң» деп туруп алды. Ал кишинин айтканын эки кылбай, 2001-жылы Исхак Раззаков атындагы Кыргыз мамлекеттик техникалык университетинин энергетика факультетине тапшырып, аны 2006-жылы аяктагам.

Башында көп кыйынчылыктар болду. Баарын жеңип, күнүнө жаңы нерсе үйрөнүп, жакшы иш алып барууга бүт күчүмдү жумшап келем. Биздин жумушта жеке коопсуздук маселеси 1-орунда каралат. Токтун жыты жок, аны көрбөйсүң. Эреже менен өтө кылдат иш алып барасың. Биринчи кезекте элге жарык менен жылуулукту камсыздоо керек.

Учурда «Түндүк электр» ишканасынын Талас филиалында трансформаторлорду оңдоо цехинде жалпы 6 киши иштейбиз. Биз күйүп кеткен трансформаторлорду оңдоп, кайра ишке киргизип, көмөк чордонго жан беребиз десем жаңылышпайм. Бүгүнкү күндө «Түндүк электр» ачык акционердик коому тарабынан ийгиликтүү иштер болуп жатат. Азыр күйүп кеткен трансформатор оңдолгончо ордуна резервдик трансформаторлор пайдаланылат. 2019-жылдын 9 айында 48 трансформаторду оңдоп ишке киргиздик. Энергетиктердин жумушу эң татаал десем жаңылышпайм. Кар жаайбы, жамгыр жайбы, күн ысыкпы, суукпу ага карабай элге электр энергияны үзгүлтүксүз бергенге аракет кылабыз. Биздин негизги милдетибиз — кардарларга үзгүлтүксүз электр энергиясын жеткирүү жана сапатуу тейлөө. Ар бир үйдө жылуу жана жарык болушун каалайбыз», - деди ал.

Аман Оболбеков үй-бүлөдө 3 кыз, 1 уулдун атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×