Бөлүмдөр
Дүйшөмбү, 14-октябрь
Ош облусуКара-Суу району 13.09.2019 22:00

Кара-Суунун Ош шаарына чектешкен 4 айылынын эли маршруттук каттамы жана таза суусу жок күн кечирүүдө (сүрөт)

Turmush -  Кара-Суу районуна караштуу Ак-Буура-1, Ак-Буура-2, Ак-Буура-3, Ак-Буура-4 айылынын тургундары маршруттук каттамы, таза суусу жана жолу жок күн кечирип келет. Бул тууралуу өкмөттүн Ош облусундагы өкүлчүлүгүнүн басма сөз катчысы Нуркыз Кадырбек кызы билдирди.

Анын айтымында, Папан айыл өкмөтүнүн Ак-Буура-1, Ак-Буура-2, Ак-Буура-3, Ак-Буура-4 айылында көп жылдардан бери маршруттук каттам жок.

«10-сентябрь күнү өкмөттүн Ош облусундагы өкүлү Узарбек Жылкыбаев райондун борборунан 30 км, айыл өкмөттүн борборунан 40 км алыста жайгашкан Ак-Буура-1, Ак-Буура-2, Ак-Буура-3, Ак-Буура-4 айылдарынын калкы менен жолугушту. Ош шаарына чектеш жайгашкан аталган айылдарда жалпы 2 миңдей түтүн жашаганы менен бир айылдан 10дон гана үй-бүлө каттоого турган. Мындан сырткары айылдарда бир дагы социалдык объект курула элек. Бир гана жеке менчик бала бакча иштейт. Окуучулар Ош шаарындагы мектептерде окушат.

Өкмөттүн өкүлчүлүгү тарабынан Кара-Суу районунун акимине жана айыл өкмөт башчысына кийинки жылы калкты каттоо иштерине чейин айылдарга маршруттук каттамды уюштуруу тапшырмасы берилди. Буга чейин жергиликтүү бюджеттин эсебинен маршруттук каттам ачууга жашоочулардын саны аз болуп, тоскоолдук жаратып келген.

2 айылда таза суу жетишсиз. Ошондуктан таза суу чыгаруу үчүн резервдик фонддон 150 миң сом каражат бөлүндү. Ал эми аким Тилек Матраимов Ак-Буура-3 айылындагы футбол аянтчасын керектүү жабдыктар менен камсыздап берүүнү убадалады. Эң башкы көйгөй катары Ак-Буура-4 айылындагы көпүрө айтылды. Айыл Ош шаары менен чектешет жана аларды байланыштырган атайын көпүрө бар. Бирок шаар тургундары көпүрөнүн жолун таш менен тосуп салышкан. Шаардыктар көпүрөдөн тараган чаң үйлөрүнө кирип жатканын айтышкан. Учурда Ош шаардык мэриясы менен сүйлөшүү иштери жүргүзүлүүдө. Буга чейин тургундар мэриянын жолду ачуу тууралуу сунушун четке кагышкан», - деди Н.Кадырбек кызы.


Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×