Бөлүмдөр
Бейшемби, 19-сентябрь
Нарын облусуЖумгал району 10.09.2019 10:24

Жаңы-Арыктын башчысы менен мектептин директору эмне үчүн элден бош үйлөрдү сурап жүрүшөт?

Turmush -  Жумгал районунун Жаңы-Арык (Кызарт) айылындагы Айып Идинов атындагы орто мектеби авариялык абалда.

Учурда мектептин эки корпусунун бири (чоң корпус) жарактан чыккандыктан мектеп директору, айыл өкмөт башчысы окуу процессин үзгүлтүккө учуратпоо үчүн айылды кыдырып, элдин бош үйлөрүн сурап жүрүшөт.

«Мектеп 2 корпустан турат, анын бири 2016-жылдан бери авариялык абалда. ӨКМ окууга тыюу салгандан бери бир корпуска тыгылып, 2 нөөмөт менен окуп келгенбиз. Окуучулар көбөйүп, окуу программасына жетише албай жатабыз. Ошондуктан башталгыч класстын 10 классын үйлөрдө окутууга мажбур болуп жатабыз. Башталгыч класстарда жалпы 187 окуучу бар. Азыркы учурда үч үй табылды. Бирок ижара акы маселеси кыйын болуп жатат.

Коңшу айылдагы К.Мамбеталы уулу атындагы орто мектебине баруу үчүн 3 чакырым жолду басуу керек. Ал жакка 3 балабыз каттап окуп жатышат», - дешет мектеп жамааты.

Ал эми райондук билим берүү бөлүмү окуу процессин үзгүлтүккө учуратпай, балдарга үйдө болсо дагы билим берүү зарыл экенин билдирди.

Кара-Булак орто мектебинин имараты 1935-жылы курулуп, анда балдар 7 жыл окушкан. Кийин Кара-Булак мектеби менен Базар-Турук башталгыч мектеби бириктирилип, 1950-1951-окуу жылдарында Коммунизм жети жылдык мектеби болуп уюшулган. 1974-1975-окуу жылдарында окуучулардын саны өскөндүгүнө байланыштуу кошумча мектеп курулуп, Коммунизм жети жылдык мектеби орто мектеп болуп түзүлгөн. 1992-жылы Кызарт орто мектеби болуп аталган. 1998-жылдын 21-июнунда профессор Айып Идиновдун ысымы берилген.

Айып Идинов 1927-жылы Жумгал районунун Жаңы-Арык айылында туулган. Тарых илиминин доктору (1978-жыл), профессор (1981-жыл), Кыргыз Республикасынын элге билим берүүгө эмгек сиңирген кызматкери (1993-жыл) болгон. Кыргызстан КП БКнын алдындагы республикалык партиялык мектепти 1951-жылы жана Кыргыз мамлекеттик университетинин тарых факультетин 1958-жылы аяктаган.

1943-1949-жылдары Жаңы-Арык айыл кеңешинин катчысы, комсомолдун Жумгал районунун 1-2-катчысы, Тянь-Шань обкомунун катчысы, 1958-1961-жылдары аспирант, 1962-жылы КМУда улук окутуучу болгон. Кафедра башчысы, парткомдун катчысы болуп иштеген. СССРдин жогорку билим берүүнүн, КРдин эл агартуунун отличниги.

Аталган мектептин жаңы имараты 2016-жылы арабдар тарабынан курулат деп өкмөттүн тизмесине кирген. Бирок арадан 3 жыл өтсө да жаңы мектепти куруу иштери баштала элек. Учурда бул мектепте 412 окуучу билим алат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×