Бөлүмдөр
Бейшемби, 19-сентябрь
Талас облусуБакай-Ата району 06.09.2019 10:00

«Анара кетпечи, экөөбүз күйөөсү-аялы болобуз»: Окуучунун арзуусу, мугалим Замира Жумашованын кызыктары. Сүрөт

Turmush -  Талас районуна караштуу Манас айылынын 55 жаштагы тургуну Замира Жумашова 32 жылдан бери башталгыч класстардын мугалими болуп иштеп келе жатат. Аймактык кабарчы аны менен таанышты.

Өзүнүн айтымында, Нарын облусунун кызы.

«Жогорку окуу жайга барып, ал жактан жолдошум менен таанышып калгам. Сүйүү күчтүү экен, ата-энем «Талас алыс, ал жакка эмне бар?» деп айтканына карабай келе бергем. Келин болуп келгенде бул жактагылар «Нарындан ушундай бир сары бала табылган жокпу?» десе аларды жаман көрүп, сөздөрүн кулагымдын сыртынан кетирип койчумун. Баарына чыдап, үзүрүн көрүп, 33 жылдан бери жашап келебиз.

Жолдошум дагы мугалим. Экөөбүз тең Манас айылындагы лицейде иштейбиз. Кайын агам мугалим, кайын атам дагы өмүр бою агартуу тармагында эмгектенген. Кайын атам Ороз Жанузаковдун ысымы мектепке берилген. Жолдошум экөөбүздүн кесибибиз бир болгондон кийин жакшы тил табышабыз. Бири-бирибизге жардам берип, ачык сабактарды талкуулап калабыз. Азыр дагы жардамдашып келебиз. Келиним дагы мугалим болуп иштейт. Көптөр бизди «мугалимдердин династиясы» деп калышат.

Ишим менен сыймыктанам. Бала кезимде дарыгер болом деп калчумун. Азыр эми мугалим болуп калганыма кубанам. Болгондо дагы башталгыч класстын мугалими болуп калганыма сүйүнөм. Анткени балдардын аурасы таза. Булар менен жүргөндө жаш баладай тазарасың. Көптөгөн балдардын жүрөгүндө биринчи мугалим катары сакталып калат эмеспизби. 7 классты жогорку класска узаттым», - деди ал.

Каарманыбыз буга катар эле жумушундагы кызыктуу окуяларды айтып берди.

«Алгачкы классымдагы бир бала класстагы окуучу кызды жакшы көрөт экен. Ал кызым башка мектепке которула турган болуп, коштошуп жаткан. Баягы балам «Анара, токто, сен кетпечи. Экөөбүз күйөөсү-аялы болобуз» десе аябай күлгөм. Кичинекей балдар дагы ушинтип айтат турбайбы деп таң калгам.

Адеп сабагында бир макаланы чечмелеп, аны ролго салып аткарып жаткан элек. Бир кызым ролун аткарбай жатат. «Эмне болду?» десем, «Улуулардан сөзүн угуш керек» дейсиз. Апам «улуулардын сөзүн тыңшабаш керек» деп айткан» дейт. Аябай күлүп калгам. Угуу менен тыңшоо деген сөздүн мааниси башка деп түшүндүргөм (күлүп). Кийин дагы сабак өтүп жатып маселе аткарууга токтолдук. «Зоопаркта 12 коён бар. Анын бешөө качып кетти. Бул маселеге кандай суроо койсок болот?» дедим. Бир балам «аларды кубалап кармаш керек, маселе чечилет» деп жооп берип күлкүгө бөлөгөн.

Окуучулар үйүндө болгон жагдайларды дагы айтып келе берчү. Азыркы балдар андай эмес, мурункулар баёо болушчу. Бир окуучу балам «Апам атамды «акча таппайсыңбы» деп урушту. Мен жакшы окуп, чоңойгондо акча таап, үй-бүлөмдү багам» деп мени кучактаганда жүрөгүм суурулуп кете жаздаган. Бир четинен кайгырсам, экинчиден бала «жакшы окуйм» деп сөз берип жатканы кубандырган. Чындыгында ошол бала начар окуучу. Ошол күндөн баштап журналдан жалаң 4-5 деген гана бааларын көрүп калдым.

Балдар үйлөрүндө болгондун баарын айта беришчү. Бирок менде сыр бойдон сакталып калат. Ата-энелер менен чогулушта «бардык сырларыңарды билем» деп тамашалап калсам баары күлүп калышат», - деди ал.

Мугалим айым «Эл агартуунун отличниги» наамынын ээси, 4 баланын апасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×